اتىراۋدا 25 ادام ءىستى بولدى

اتىراۋ وبلىسىندا جىل باسىنان بەرى قۇرامىندا ەسىرتكىسى بار 5 مىڭ داناعا جۋىق ءدارى-دارمەك تاركىلەندى دەپ حابارلادى turkystan.kz.

وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى باسشىسىنىڭ ورىنباسارى رومان ەرمۇحانوۆتىڭ مالىمەتىنشە، «دارمەك» جەدەل-پروفيلاكتيكالىق ءىس-شاراسى كەزىندە 5 مىڭ داناعا جۋىق ترامادول جانە تروپيكامەد ءدارى-دارمەكتەرى تاركىلەنىپ، اكىمشىلىك حاتتامالار تولتىرىلعان.

«جىل باسىنان بەرى ەسىرتكىگە قاتىستى 75 قۇقىق بۇزۋشىلىق تىركەلدى. ونىڭ باسىم كوپشىلىگى ەسىرتكى زاتتارىن ساتۋ فاكتىسى بولىپ وتىر. جالپى ەسىرتكىنىڭ زاڭسىز اينالىمى بويىنشا 25 ادام قىلمىستىق جاۋاپكەرشىلىككە تارتىلدى. ونىڭ ىشىندە 19 ادام باس بوستاندىعىنان ايىرىلدى»، – دەيدى رومان ەرمۇحانوۆ.

ونىڭ ايتۋىنشا، وبلىستىق ناركولوگيا ديسپانسەرىنىڭ ەسەبىندە 508 ادام تۇر. بۇل كورسەتكىشتى ازايتۋ جانە وڭىردە ەسىرتكى ساۋداسىن بولدىرماۋ ءۇشىن كوپتەگەن ءىس-شارا ءوتىپ جاتىر. وبلىس اۋماعىندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى مەن ۋچاسكەلىك پوليتسيا ينسپەكتورلارى 4 پروفيلاكتيكالىق ءىس-شارا وتكىزگەن.

«ناتيجەسىندە ەسىرتكى ساتاتىن ينتەرنەت-سايتتاردى جارنامالايتىن 150 گراففيتي جازبالار جويىلدى. جاقىندا ەسىرتكىمەن كۇرەس كۇنىنە وراي جاستار اراسىندا سپورتتىق شارالار، شىعارماشىلىق بايقاۋلار، مەرەكەلىك كەش، ارنايى مامانداردىڭ قاتىسۋىمەن سەمينار-ترەنينگتەر ۇيىمداستىرىلدى»، – دەپ ءمالىم ەتتى رومان ەرمۇحانوۆ.

ۇقساس جاڭالىقتار

Back to top button