Мемлекеттік айыптаушы Атамбаевты 15 жылға соттауды сұрады

Қырғызстанның экс-президенті Алмазбек Атамбаевтың адвокаты Замир Жоошевтың айтуынша, мемлекеттік айыптаушы экс-президентке 15 жыл түрме жазасын сұраған. Сондай-ақ, барлық мемлекеттік марапаттаудан айырып, дүние-мүлкін тәркілеуді сұраған. Сот үкімі 18 маусымда жарияланады. Батукаевты заңсыз босатты деген іс бойынша 19 адам жауап беріп жатыр. Оның ішінде 4 басты күдікті бар, солардың бірі - Алмазбек Атамбаев. Қылмыс әлемінің белсендісі Азиз Батукаев 2013 жылы Нарын түрмесінен дәрігерлердің қатерлі ісік ауруымен ауырады деген анықтамасы бойынша мерзімінен бұрын бостандыққа шыққан. Сол күні ол Грозный (Шешенстан, Ресей) қаласына ұшып кеткен. 2019 жылы елдің ішкі істер министрлігі бұл оқиға бойынша қылмыстық іс қозғап, тергеу жұмысын бастаған. Басты айыпталушылар - елдің бұрынғы президенті Алмазбек Атамбаев, бұрынғы бас прокурор Индира Жолдубаева, Жазаларды атқару мемлекеттік қызметі төрағасының бұрынғы кеңесшісі Калыбек Качкыналиев пен Гематология орталығының бұрынғы директоры Абдухалим Раимжанов.