جاڭالىقتار

بلوك-بەكەتتەن ءوتۋ ءۇشىن جەكە كۋالىگىڭىزدى الىپ ءجۇرىڭىز

ەلوردادا كارانتين ەنگىزىلۋىنە بايلانىستى قۇرىلعان بلوك-بەكەتتەن ءوتۋ ءۇشىن ازاماتتار مىندەتتى تۇردە جەكە كۋالىگىن وزىمەن بىرگە الىپ ءجۇرۋى كەرەك. بۇل تۋرالى نۇر-سۇلتان قالالىق پوليتسيا دەپارتامەنتى باستىعىنىڭ ورىنباسارى ايدوس رىسباەۆ ايتتى.

«حابار 24» تەلەارناسىنىڭ تىكەلەي ەفيرىنەن ايدوس رىسباەۆ: «نۇر-سۇلتان قالالىق پوليتسيا دەپارتامەنتى كوروناۆيرۋس ينفەكتسياسى تارالۋىنىڭ الدىن الۋ جانە جولىن كەسۋ بويىنشا شارالار قابىلداۋدا. ەلوردالىق پوليتسيا جەكە قۇرامى جۇمىس اتقارۋدىڭ ەرەكشە تارتىبىنە اۋىستىرىلدى. پوليتسيا دەپارتامەنتى 22 ناۋرىز كۇنى ساعات 00-00-دە ەلورداعا كىرەتىن جانە شىعاتىن جولداردىڭ جابىلاتىنىن ەسكەرتەدى. كولىك كەپتەلىسى مەن كەزەكتە تۇرماس ءۇشىن قالا تۇرعىندارى مەن قوناقتارىنا الدىن الا ءتيىستى شارالار قابىلداۋعا كەڭەس بەرەمىز. بلوك-بەكەتتەگى پوليتسيا قىزمەتكەرلەرىنە كورسەتۋ ءۇشىن وزدەرىڭىزبەن بىرگە مىندەتتى تۇردە جەكە كۋالىك جانە باسقا دا قۇجاتتارىڭىزدى الىپ ءجۇرۋدى ۇسىنامىز»، – دەدى.

ونىڭ اتاپ وتۋىنشە، نۇر-سۇلتان قالاسىنىڭ اۋماعى بويىنشا جاقىن ماڭداعى جىبەك جولى، قوسشى، قاراوتكەل، تالاپكەر، قوياندى كەنتتەرىن قوسا العاندا بارلىق باعىتتا 7 بەكەت قويىلدى. جۇك اۆتوكولىكتەرى ءۇشىن ترانزيتتتىك ءجۇرۋ نۇر-سۇلتان قالاسى ماڭىنداعى اينالما اۆتوجول بويىنشا قاراستىرىلعان.

«كارانتيننىڭ ءبىرىنشى كۇنى تىنىش ءوتتى. پوليتسيا قىزمەتكەرلەرى ەكى مينۋتتىڭ ىشىندە پلانشەت كومەگى ارقىلى ەلەكتروندى بازا بويىنشا تەكسەرۋ جۇرگىزدى. تەكسەرۋ بارىسىندا شىدامدىلىق پەن تۇسىنىستىك تانىتقان اۆتوكولىك جۇرگىزۋشىلەرى مەن جولاۋشىلارعا العىس ايتامىز. ەنگىزىلگەن شارالار ازاماتتاردىڭ قاۋىپسىزدىگىن قامتاماسىز ەتۋ ءۇشىن قاجەت»، – دەدى ول.

Back to top button