292
Қазақтың туын ұстаған америкалықтар: Димашты Нью-Йорк қалай қарсы алды?
Қазақтың туын ұстаған америкалықтар: Димашты Нью-Йорк қалай қарсы алды?
Америкалық жанкүйерлері Димашты Нью-Йорктегі Джон Кеннеди атындағы халықаралық әуежайында Қазақстанның жалауымен қарсы алды. Бұл туралы dimashnews.com хабарлады.
Нью-Йорктегі Джон Кеннеди атындағы халықаралық әуежайы өзінің тарихында көптеген танымал тұлғалар мен жарқын кездесулердің куәсі болғаны анық. Алайда АҚШ-тың ең ірі әуежайларының бірде-бірінде алыстағы Қазақстанан келген әншіні дәл бұлай, үлкен салтанатпен қарсы алмаған болар.
Димаш Құдайбергенді әлемнің түкпір-түкпірінен келген 150-ге тарта жанкүйері гүл шоқтарымен күтіп алды. Әртүрлі мемлекеттен жиналған көпшіліктің арасында жасы да, кәрісі де бар. Димашты қарсы алушылардың көпшілігінің қолдарында Қазақстанның көк туы желбірейді. Сонымен қатар сүйікті әншілерінің портреттік суреттерін де ұстап шыққандар кездеседі. Жанкүйерлері қазақстандық танымал әншінің концертіне сәттілік тілесе, бірнеше сағаттық ұшудан кейін шаршаса да, Димаш оларға әдеттегідей алғыс айтып, бірге естелік үшін фотоға түсті.
Айта кетсек, концерт Қазақстанның АҚШ-тағы мәдениет күндері аясында ұйымдастырылып отыр. «Arnau tour ENVOY» - маусым айында «Қазақстан» РТРК» АҚ ұйымдастыруымен Нұр-Сұлтан қаласында өткен «ARNAU» концертінің жаңарған нұсқасы. Әлем тыңдармандары бұл кеште жаңа бағдарламамен қатар, «ARNAU» бағдарламасының үздік нөмірлерін көретін болады.
Димаштың Нью-Йорктегі концертіне билеттер бір жарым айда сатылып кеткен. Сондай-ақ, әншінің Нью-Йоркте 10 желтоқсанда өтетін жеке концертіне әлемнің 51 елінен жанкүйерлер келеді.
