5 Қыркүйек 2019, 10:31 631 0 Нұр Отан Әсел ӘНУАРБЕК

"Қоғам" апталығы

Маңызды мәселелер талқыланды

«Nur Otan»  партиясы елордалық  филиалының партиялық активі Саяси Кеңестің шешімдерін талқылады. Елордалық партия активінің отырысында сыбайлас жемқорлыққа қарсы күресті жүйелі түрде күшейту, қалалық мәслихаттағы партия фракциясының жұмысын күшейту, халықтың өтініштеріне жедел ден қою мәселелері сөз болды.

Кездесудің басты тақырыбы – «Болашаққа  нық қадам». Естеріңізге сала кетейік, бағдарламалық құжатта партия Төрағасы, Елбасы Нұрсұлтан Назарбаев партияның белсенді мүшелерін шоғырландыру бойынша шаралар қабылдауды, сыбайлас жемқорлыққа қарсы күресті күшейтуді және партия ішінде «тазалау» жүргізуді, партия органдарының әлеуетін барлық деңгейде барынша жүзеге асыруды, биліктің барлық деңгейлерінде партиялық жауапкершілікті арттыруды тапсырған болатын.

«Сыбайлас жемқорлыққа қарсы күрес тұрақты болуы тиіс. «Адалдық алаңы» жобасы бойынша сыбайлас жемқорлықтың алдын алу және ескерту бойынша нақты нәтижелер бар. Біз партияның белсенді мүшелерін қоғамдық бақылауды бірге өткізуге шақырамыз. Тек транспаренттілік адам факторын алып тастауға мүмкіндік беретін, сондай-ақ цифрландыру әсіресе мемлекеттік қызмет көрсету саласында көмек көрсетуге көмектеседі», – деп атап өтті «Nur Otan» партиясының қалалық филиалының төрағасы, Нұр-сұлтан қаласының әкімі  Алтай Көлгінов.

Елорда әкімі сондай-ақ мәслихаттағы депутаттық фракцияның мемлекеттік бағдарламалардың іске асырылуына партиялық бақылауды күшейтуді тапсырды. Конституция күні қарсаңында жаңадан қабылданған партия мүшелеріне партиялық билеттер табыс етілді, ал қалалық партия ұйымының белсенділері алғыс хаттармен марапатталды.

 

Партия құрамы жастармен толықпақ

«Nur Otan» партиясы Ақтөбе облыстық филиалы Саяси кеңесінің кеңейтілген отырысында партия жұмысын жаңғырту бойынша негізгі міндеттер, жұмысты жетілдіру жолдары мен партияның облыстық филиалы Саяси кеңес Бюросының құрамына өзгерістер енгізу мәселелері талқыланды.

«Nur Otan» партиясы Ақтөбе облыстық филиалының төрағасы, Ақтөбе облысының әкімі Оңдасын Оразалин «Сенім. Диалог. Болашаққа нық қадам – «Nur Otan» партиясының 7 серпіні» бағдарламасында Елбасы партияның белсенді мүшелерін топтастыру, жемқорлықпен күресті күшейту және партиядан лайықты емес мүшелерді шығару үшін шаралар қабылдауды, барлық деңгейде партия органдарының әлеуетін мейлінше жүзеге асыруды, биліктің барлық деңгейінде партиялық жауапкершілікті арттыруды тапсырғанын атап өтті.

«Алдағы уақытта қоғамдық мәселелерді ұдайы көтеріп жүрген, оны шешуді ұсына білетін, өз сөзін дәлелдей алатын азаматтар партия қатарына тартылатын болады. Партия мүшелерінің қоғамда болып жатқан жағдайларға немқұрайлы қарамай, дер кезінде үн қатуы, нақты іс-шаралар қолданылуы назарға алынады», –  деді партияның облыстық филиалының төрағасы.

Сондай-ақ Оңдасын Оразалин кәсіпкерлікпен айналысамын деген адамдарға жағдай жасалатынына назар аударды. Тек дені сау, еңбекке қабілетті адам жұмыс істеуі керек. Ол масылдық қарым-қатынасты жою және халыққа барлық бағдарламалар жөнінде түсіндіру қажеттігіне ерекше тоқталды. «Партия Төрағасы елімізде атқарылып жатқан жұмыстардың дұрыс бағытта жүріп келе жатқанын айта келе, ел жастарын еңбек етуге үндеп, масылдықтан арылуға шақырды. Қазіргі таңда шағын және орта бизнеспен айналысамын деген адамдарға жол ашық, мемлекет тарапынан жан-жақты қолдау бар. Осыған байланысты «Еңбек» бағдарламасы аясында «Бизнес бастау», «Жас маман», «Жас кәсіпкер» жобалары жақсы іске асырылып, өңірімізде көптеген жұмыстар жасалып, оң нәтижелерін беріп келеді», –  деді ол.

Күн тәртібі бойынша сөз алған партияның Ақтөбе облыстық филиалы төрағасының орынбасары Нұрхан Ағниязов қазір облыстық филиалға қарасты  251 бастауыш партия ұйымында  44284 партия мүшесі бар екенін атап өтті. «Партия Төрағасының Саяси кеңесте көтерген мәселесіне орай, партияда ел дегенде жанашырлықпен жұмыс істейтін, халыққа шын жаны ашитын белсенділермен жұмысты жалғастырып, партиядан байланыс үзген мүшелерді партия мүшелігінен шығару жұмыстары басталды», – дей келе, Нұрхан Ағниязов партияның облыстық филиалында бастауыш партия ұйымдарының белсенділігін арттыруға ерекше көңіл бөлінгенін тілге тиек етті.

Партияның Ақтөбе қалалық филиалы төрағасының бірінші орынбасары Нұрлыбек Жүсіповтің айтуынша, тұрғындардың әлеуметтік желілерде көтерген мәселелеріне орай қаланың мөлтек аудандарында көшпелі қоғамдық қабылдаулар ұйымдастырылуда. Сондай-ақ «Құтты мекен» ұлттық жобасы аясында қалада «Нұрлы жер» және «Нұрлы жол» бағдарламалары бойынша салынып жатқан құрылыс нысандарына партиялық бақылау бекеттері орнатылып, нәтижесінде тұрғындар мен партия арасында тығыз байланыс жолға қойылған.

«Jas Otan» Жастар қанатының облыстық филиалы төрағасы Асылжан Бүркіталин «Ардагерлерді ардақтайық», «English for Jastar» жобасы мен «TazaQazaqstan» экологиялық акциясы аясында және еріктілікті дамыту бойынша атқарылып жатқан жұмыстарды баяндады. Сондай-ақ, Ақтөбе облысында жас депутаттардың саны аз екенін айта келе, Елбасы тапсырмасына орай барлық деңгейдегі мәслихаттарда жастардың үлесін арттыру қажет екеніне тоқталды. Оның айтуынша, бұл жұмысқа ақтөбелік жасотандықтар  дайын.

 

Балалар құқығын қорғау – негізгі міндет

«Nur Otan» партиясы жанындағы балалардың құқықтарын қорғау жөніндегі Республикалық Кеңестің жұмыс тобы Жетісу өңіріне табан тіреді.

Басты мақсат – «Бақытты отбасы» жобасы аясында жасалған арнайы Жол картаның өңірде жүзеге асырылу барысымен танысу, балалардың құқықтарын қорғау және аз қамтылған  жағдайы төмен отбасыларға көмек көрсету бойынша атқарылып жатқан жұмыстарға назар аудару, өңірдің әлеуметтік салада атқарған жұмыстарының нәтижесімен танысу. Осы ретте ҚР Президент Әкімшілігінің бастамасымен және «Бақытты отбасы» партиялық жобасын жүзеге асыру шеңберінде Алматы облысында балалардың құқықтары мен заңды мүдделерін қорғауды қамтамасыз ету жүйесін жетілдіру ұсыныстарын зерттеу және жинау мәселелері бойынша көшпелі сараптамалық тобының отырысы өтті.

14 өңірдің әкімдері қол қойып, жүзеге асыруды бастаған «Бақытты отбасы»  жобасында отбасының қаржылық жағдайын жақсарту, балалар үшін қауіпсіз ортаны қалыптастыру, Жұмыспен қамту және қосымша білім беруді қамтамасыз ету және кәмелетке толмағандарға қатысты зорлық-зомбылықты анықтау сияқты  70-тен астам шаралар  жүзеге асырылатын болады.

«Алматы облысында балалардың өмір сүру деңгейі мен қауіпсіздік ережелеріне ерекше назар аударамыз. Арнайы «Жол картасы» аясында балалардың әр түрлі ортада өмір сүру сапасын анықтаймыз: мектеп, мектепке дейінгі білім беру мекемелері, көше, үй алаңдары. Барлық мекемелерде балалардың қауіпсіздігі аса маңызды. Ең алдымен өзіне-өзі қол жұмсау, балалар қылмысы, баланың білім алып, тәрбиеленуіне қажет инфрақұрылымды қамтамасыз ету шаралары», – дейді  Республикалық кеңес  төрағасының орынбасары Динара Закиева.

«Алматы  облысында өңір басшылығы өз жол картасында отбасы және жастар істері жөніндегі басқарманың ашылуын бекітті, ол ведомствоаралық үйлестіруді құруға және балалар мен отбасылардың құқықтары мен заңды мүдделерін қорғау саласында жүйелі тәсілді орталықтандырып құруға мүмкіндік береді», – деп атап өтті «Nur Otan» партиясы жанындағы балалардың құқықтарын қорғау Кеңесінің мүшесі Рысты Мағауияқызы.

 

Жаңа технология мүмкіндігі таныстырылды

ҚР Парламенті Мәжілісінің депутаттары, «Nur Otan» партиясы парламенттік фракция мүшелері Гүлжан Қарағұсова, Татьяна Яковлева және Жексенбай Дүйсебаев Ақмола облысы Ақкөл қаласының Ахуалдық орталығының жұмысымен танысты.

«Smart city – Ақылды қала» заманауи технологияларын енгізу жөніндегі пилоттық жоба «Цифрлы Қазақстан» мемлекеттік бағдарламасы шеңберінде жүзеге асырылды.

Сапар барысында депутаттар назарына тұрғын үй-коммуналдық ша­­руашылығын қашықтықтан басқару, қаланың тыныс-тіршілігін қамтамасыз ету, жол қозғалысын басқару және үйлестіру, экологиялық жағ­­дай бойынша технологиялар ұсы­нылды. Ақкөл қаласында автоматты режимде әр үйдің суды тұтыну көлемі есептеледі. Жаңа технологиялардың көмегімен су құбырларының зақымдануын бірден анықтауға болады.

Барлық деректер ахуалдық орталыққа – диспетчерлік зал, мониторинг үшін бейне қабырғалы, бейнекон­ференцбайланыс жүйесі, call-орталығы бар объектіге түседі. Ахуалдық орталық ведомствоаралық өзара іс-қимылды ұйымдастыру, қаланың тыныс-тіршілігін тактикалық және стратегиялық басқару бойынша ше­шім­дерді көрсету, коммуналдық қызметтерді басқару, қалалық ресурстар туралы шынайы және уақтылы мәліметтерді агрегациялау, қауіпсіздікті қамтамасыз ету үшін қажетті ин­фра­құрылыммен жабдықталған.

Деректерді жинау және өңдеу «Қазақтелеком» АҚ Деректерді өңдеу орталығында жүргізіледі. Қаланың барлық аумағы бойынша өзекті ақпараттың өсіп келе жатқан көлемін жинау мақсатында «Қазақтелеком» АҚ қажетті сандық және зияткерлік инфрақұрылым құрды.

Орталық жұмысымен танысу қорытындысы бойынша депутаттар Ақкөл қаласының тәжірибесін республиканың басқа өңірлерінде одан әрі тарату мәселесін қарады.

 

Тұрғын үй құрылысы жанданады

Қазақстан Республикасы Парламенті Мәжілісінің депутаттары Мейрам Пішембаев пен Нұрлан Әбдіров жұмыс сапары барысында Павлодар облысының Ақсу қаласындағы екі пәтерлі үйлердің құрылыс алаңына барды.

Жеке тұрғын үй құрылысы шағын ауданында салынып жатқан үйлерді тұрғын үй кезегінде тұрған 56 отбасы күтуде. Мердігерлердің айтуынша, барлық коммуникация орнатылады: жылу, жарық, электр, кәріз жүйелері. Нысанды ағымдағы жылдың қазан айында тапсыру жоспарланып отыр.

«Біз, «Nur Otan» партиясы фракция­сының депутаттары, осындай ны­сандардың бақылауына ерекше на­зар аударатын боламыз, құрылыс жұмыстарының барысымен үнемі танысып, тұрғын үймен қамтамасыз етуді бақылаймыз. Ақсу қаласы үлгісіндегі жұмысты еліміздің басқа өңірлерде іске асырғаны жөн», – деді Мейрам Пішембаев.

Айта кету керек, жеке тұрғын үй құрылысын абаттандыру үшін қала биліктері бұл жерде жолдарды салып, шағын және орта бизнесті дамыту үшін компанияларды тартуды жоспарлап отыр.

 

Әр қазақстандықтың өміріне қатысты құжат

Л.Н.Гумилев атындағы Еуразия Ұлттық университетінде Президенттің Қазақстан халқына жолдауы талқыланды. Университет пен «Nur Otan» партиясының «Нұр» бастауыш партия ұйымы бірлесе ұйымдастырған шарада саясат, экономика, филология саласының академиктері мен сарапшылары, партия мен  кәсіподақ өкілдері бой көрсетті.

«Президент жолдауы – әр қазақ­стандықтың өміріне қатысты құжат. Бұл жолдау бізді тұрақтылық пен дамуға алып келеді  Елбасы елдің дамуы экономикаға тікелей байланысты екенін баса айтқан болатын. Тек бәсекеге қабілетті мемлекеттер бұл әлемде өзіндік орнын  ала алады», – деді Л.Н.Гумилев атындағы ЕҰУ ректоры, «Nur Otan» партиясының «Нұр» филиалының төрағасы Ерлан Сыдықов.

Қазақстандық салалық білім және ғылым қызметкерлері кәсіподағының төрайымы  Майра Амантаева өз сөзінде Президенттің қоғамдық митингтер өткізу мәселесіне қатысты ұстанымын қолдап, нәтижесінде бұл реформалар халық бірлігі мен мемлекеттің дамуына жол ашуы тиіс екенін атап өтті.

Л.Н.Гумилев атындағы Еуразия ұлттық университетінің экономика факультеті, туризм кафедрасының меңгерушісі Азамат Дүйсенбаев Президенттің айтып өткен еліміздегі туризмді дамыту тақырыбын көтерді. Ғалым сондай-ақ шағын және орта бизнес саласындағы оң реформалар алдағы уақытта міндетті түрде өз жемісін әкелетініне сенім білдірді.

Ғалымдар Жолдауда айтылған басты мәселелер мен алға қойылған міндеттердің  заманауи мемлекет үшін өзекті екенін атап өтті. Сарапшылар Президент ұсынған «Халық үніне құлақ асатын мемлекет» тұжырымдамасын жоғары бағалады және кері байланыстың сындарлы нысандары арқылы халықпен жедел диалог өткізу қажеттігін атап өтті.

Соңғы жаңалықтар