Ерікпеңіз, Ертісбаев!

Жұрт Ермұхамет Ертісбаев деген есім-сойды ұмыта бастағандай еді. Соңғы 6-7 жылдың көлемінде Ермұхамет Қабиденұлы еліміздің Грузия, Белоруссия сияқты мемлекеттердегі төтенше және өкілетті елшісі қызметтерін атқарып, шетте жүрген соң ол кісі жайлы көп айтылмайтын, өзі де бұрынғыдай белсенді болуды қойған. Ол түсінікті де, өйткені дипломаттың оңды-солды пікір айтқанын қайдан көріп едіңіз?! Енді жақында жұмыссыз қалған ол Tengrinews.kz порталына сұхбат беріпті. Сұхбаттың тақырыбы да «айқайлап» тұр: «Пора вернуть название Алма-Ата?" Ермухамет Ертысбаев возвращается в Казахстан» (Алма-ата атауын қайтаратын кез келді ме? Ермұхамет Ертісбаев Қазақстанға оралады – ред.). Е.Ертісбаев сұхбатында қазір Алматының адам танымастай өзгеріп, құлпырғанын айта келіп, «Айтпақшы, елордамыз Нұр-Сұлтан дефис арқылы жазылатын болса, бәріміз үшін де сүйкімді (!) «Алма-ата» атауын да қайтаратын уақыт жеткен шығар?» депті. Адам жұмыссыз қалдым екен деп, ойға не түссе соны айта беруге бола ма? Қанша дегенмен, неше жыл бойы дипломат болып қызмет атқарғаны бар, әдеп сақтап, онсыз да қамысқа тиген өрттей лаулап жанғалы тұрған көңіл-күйді одан сайын өршітпей, ел-жұрттың қитығына тимей, жөнімен отырса болар еді-ау! Не дейміз, «ауру қалса да, әдет қалмайды» деген. Ерікпеңіз, Ермұхамет мырза!

Ә.Байбол.

Серіктес жаңалықтары