تۇركىستان – تەكتى ءتورىمىز

وتكەن جىلى «تۇركىستان – تۇركى الەمىنىڭ مادەني استاناسى» اتانىپ، ءاز ناۋرىزدان قىراۋلى قاراشا ايىنىڭ سوڭىنا دەيىن نەبىر ءىرى-ءىرى، ىرگەلى دە ىزگىلىكتى ءىس-شارالاردىڭ وتكەنى بەلگىلى. سولاردىڭ ءبىرتالايىنا قاتىسىپ، ءتانتى بولدىق. كۇللى تۇركى حالىقتارى وكىلدەرىنىڭ باسى قوسىلعاندا، ولاردىڭ تۇركىستاندايىن تەكتى شاھاردى، تەڭدەسى جوق شايىرىمىز، دانىشپان ءدىندارىمىز، تەرەڭ ويشىلىمىز قوجا احمەت ياساۋي بابامىزدىڭ كوك كۇمبەزدى كەسەنەسىن ارالاعانداعى تولقىنىسى مەن قۋانىشىن كورىپ، كوپ نارسەگە كوز جەتكىزىپ، كوڭىل سۋاردىق.

ماسەلەن، «تۇركىستان – تۇركى الەمىنىڭ مادەني استاناسى» اكتسياسى العاش اشىلاردا «قوش كەلدىڭ، ءاز ناۋرىز» مەرەكەسىندە وتىزعا جۋىق تۇركى ەلدەرىنەن كەلگەن ونەر يەلەرى وزدەرىندە جاڭارۋ، تازارۋ، جاڭعىرۋ كۇنىنىڭ قالاي اتالىپ وتەتىنىن ايشىقتاپ، جان-جاقتى بەينەلەپ جەتكىزدى. شاھار ورتالىعىنداعى ەسىم حان الاڭىنداعى تۇگەل تۇركىنىڭ ناۋرىزى باعزى زاماندارداعى بابالار اماناتىن جۇرەكتەر ارقىلى جەتكىزىپ جاتقانداي اسەر ەتتى. ءوڭىر باسشىسى جانسەيىت قانسەيىت ۇلى تۇيمەباەۆ ءۇش تىلدە – قازاق، تۇرىك جانە ورىس تىلدەرىندە ءمان-مازمۇنى تەرەڭ ءسوز سويلەپ، ەلباسىنىڭ ەرەن ەرلىگىنەن باستاپ، تۇركى دۇنيەسىنىڭ وسى زامانداعى ۇمتىلىستارى مەن قۇلشىنىستارى حاقىندا سىر شەرتتى.

مىنەكيىڭىز، جاقىندا عانا شىرايلى شىمكەنت قالاسىنا ءۇشىنشى ءىرى مەگاپوليس رەتىندە رەسپۋبليكالىق مارتەبە بەرىلىپ، ءوڭىردىڭ ورتالىعى تۇركى الەمىنىڭ تەكتى تورىنە اۋىستىرىلىپ، وبلىس اتاۋى تۇركىستان بولىپ وزگەرتىلدى. وسىناۋ وراسان زور وقيعالاردان بىرەر اپتا بۇرىن مەملەكەتىمىزدىڭ ماقتانىشى اتالاتىن ماقتارالدا جەتىساي، سۋى شيپالى، توپىراعى قۇيقالى سارىاعاشتا كەلەس اۋداندارى اشىلىپ، شۇعىلالى ايماقتارعا شاتتىق شۋاعى شاشىلعان-تۇعىن. تاريحي تاعىلىمى تەرەڭ، تاڭعاجايىپ جاڭالىقتار ەلدىڭ، ۇلتتىڭ، حالىقتىڭ اتا-بابالار اماناتىنا دەگەن ادالدىعىنان، ەلباسىنىڭ بولاشاقتى بولجاي بىلگەن كورەگەندىگىنەن تۋىنداپ وتىر. وزگەشە وزگەرىستەردىڭ ءبارىن التىن قۇرساقتى ايماقتىڭ حالقى رۋحاني جاڭعىرۋدىڭ ناقتىلى ناتيجەلەرى رەتىندە باعالاۋدا.

ءبىزدىڭ كوز الدىمىزعا بىلتىرعى، «تۇركىستان – تۇركى الەمىنىڭ مادەني استاناسى» جىلى اياسىندا وتكىزىلگەن ونەگەلى شارالار كەلدى. تۇركىتەكتەس تۋىستارىمىزدىڭ شات-شادىمان كۇي كەشكەن، جانارلارى جاساۋراي تولقىعان ساتتەرىن، ىستىق ىقىلاسپەن، شىن تىلەۋلەستىكپەن تۇركىستان شاھارىنىڭ اتىنا ايتقان لەبىزدەرىن ويعا ورالتتىق.

سونىمەن، تۇركىستاندايىن وبلىس ورتالىعىندا قىزۋ جۇمىستار باستالىپ تا كەتتى. العاشقى عيماراتتاردىڭ، اكىمشىلىك-ىسكەرلىك ورتالىقتاردىڭ ورىندارى بەلگىلەنىپ، قىرۋار قۇرىلىستاردىڭ قازىقتارى قاعىلىپ، ىرگەتاستارى دا قالانا باستادى. قازىرگى زاماندا ۋاقىت جىلدام جىلجيدى. ءبىر ساعاتتى دا بوسقا جىبەرۋگە بولمايدى. قوعامدىق-ساياسي، مادەني-رۋحاني ءىس-شارالاردىڭ وبلىستىق دەڭگەيدەگىلەرى تۇگەلدەي دەرلىك تۇركىستاندا وتەتىنگە اينالدى.

ەسىم حان الاڭىندا الدەنەشە مىڭ ادام جينالىپ تۇركىستان وبلىسىنىڭ تۇڭعىش مەرەكەسى ۇيىمداستىرىلدى. ەلباسىنىڭ جارلىق جاريالاپ، تۇركىستان وبلىسى مەن شىمكەنت مەگاپوليسى حاقىندا ماعلۇمداعان مازمۇندى ءسوزى الىپ ەكراننان كورسەتىلىپ، جاريا ەتىلدى. «ءان مەن ءانشى» اتتى ايگىلى جوبا بويىنشا قازاقتىڭ تالانتتى ۇل-قىزدارى ونەر كورسەتتى. پرەزيدەنت جارلىعىمەن العاش رەت بەلگىلەنگەن ۇلتتىق دومبىرا كۇنى دە تۇركىستاندا تۇڭعىش مارتە تويلانىپ، مىڭداعان دومبىرانىڭ كۇمبىرى كوك كۇمبەزدى كەسەنە اسقاقتاعان بيىكتەردە شالقىدى. تۇركىستان وبلىستىق ءماسليحاتىنىڭ سەسسياسى، تۇركىستان وبلىستىق قوعامدىق كەڭەسىنىڭ وتىرىسى، تۇركىستان وبلىستىق ارداگەرلەر كەڭەسىنىڭ كەڭەيتىلگەن باسقوسۋ سياقتى القالى جيىندار دا تەكتى تورىڭىزدە بۇرىنعىدان باسقاشالاۋ رايدا، جاڭاشالاۋ شىرايدا جۇزەلەندى.

ءوڭىرىڭىزدىڭ ءورىسى كەڭەيدى. ءومىرىڭىزدىڭ ورەسى بيىكتەدى. تەرەڭ تۇسىنگەن، تۇيسىنگەن، سەزىنگەن جاندارعا تاپ وسىلاي، ارينە. البەتتە، استاناعا كوشەردە الاتاۋ باۋرايىنداعى ارۋ الماتىنى قيماعانداي، شىرايلى شۋاقتى، جىلى دا جايلى شىمكەنتتى قيمايتىندار دا از دەي المايمىز. ونى ايتاسىز، وڭتۇستىك قازاقستان وبلىسى دەيتۇعىن اتاۋدى دا قيماي جۇرگەندەر كوپ. ونداي-ونداي باۋىرلارىمىزدى دا تۇسىنۋگە ابدەن بولادى. قيماستىق – قاسيەتتى سەزىم. الايدا الاش ارداقتىلارى، ولاردان بۇرىنعى باعزىداعى بابالار تۋ ەتىپ كوتەرگەن تۇركىستاندايىن تەكتى ۇعىم – ۇلى ۇعىم! تۇركىستان دەگەندە تۇركى قاعاناتى، تۇركى جۇرتى، تۇركى الەمى، تۇركىلىك تەگىمىز، تۇركىلىك ءتۇبىرىمىز، تۇركىلىك تامىرىمىز قانىمىزدى قوزدىرىپ، رۋحىمىزدى اسقاقتاتپاعى ابزال. رۋحاني جاڭعىرۋىمىز تەكتەن، تۇبىردەن، تامىردان قايناپ، قاينارلانباعى ءلازىم-ءدۇر. تۇركىستان وبلىسىنىڭ قۇرىلۋى تەك تۇركىستان قالاسى مەن شاھار توڭىرەگىندە تۇراتىن جۇرتشىلىقتىڭ عانا ەمەس، ۇلىستىڭ ۇيىتقىسى، التىن قۇرساقتى ايماق، قازاقىلىقتىڭ قايماعى بۇزىلماعان ولكە اتانعان ءوڭىر حالقىنىڭ قالا بەردى تۇتاس قازاقتىڭ، تۇگەل تۇركىنىڭ قۋانىشى!

تۇگەل تۇركى الەمىنە قىمبات، قاسيەتتى تۇلعامىز – ياساۋي بابامىز: «ىشتۇگىنە قۋلىق تولعانداردىڭ، كوكىرەكتەرىندە ار-ۇيات سولعانداردىڭ جۇرەكتەرى دىرىلدەمەيدى، جاندارى تەبىرەنبەيدى» دەگەن. «تۇركىستان» گازەتى العاش دۇنيەگە كەلگەندە قازاقتىڭ، تۇركى تۋىستارىمىزدىڭ قالاي قۋانعانى جادىمىزدا جاڭعىرادى. قازاقتىڭ قالتايى – مۇحامەدجانوۆ كوكەمىزدىڭ كوزدەرى مۇڭ مۇنارىنان ارىلىپ، اقجارىلقاپ كۇي كەشكەنىن كورگەنبىز.

تۇركىستان قالاسىنىڭ كەلەشەگى دە جيىرما جىلدىعىن مەرەكەلەپ جاتقان استانامىز سياقتى كەمەل دە كوركەم ەكەنى ايان. تاياۋداعى بەس-ون جىلدىڭ بەدەرىندە تۇركىستان تۇلەپ شىعا كەلەدى. بىرلىك پەن ىنتىماقتى، تاتۋلىق پەن تۇراقتىلىقتى كوزدىڭ قاراشىعىنداي ساقتاي بىلسەك، جۇمىلا جۇمىس ىستەسەك، ەل مەن جەر تاعدىرىنا جوعارى جاۋاپكەرشىلىكپەن قاراساق، وسى وڭتۇستىگىڭىزدەن ون بەس، جيىرما جىلدا جانە ءبىر وبلىس اشىلىپ، ونىڭ ورتالىعى سارىاعاش نەمەسە جەتىساي نەمەسە شاردارا بولۋى دا بەك بالكىم.

تۇركىستان تۇعىرى – تەكتىلىك پەن تاتۋلىق!

مارحابات بايعۇت،

جازۋشى

ۇقساس جاڭالىقتار

Back to top button