وڭتۇستىك كورەيانىڭ بۇرىنعى پرەزيدەنتى 24 جىلعا سوتتالدى

سەۋلدەگى سوت وڭتۇستىك كورەيانىڭ بۇرىنعى پرەزيدەنتى پاك كىن حەنى 24 جىلعا تۇرمەگە وتىرعىزدى. ەكس-پرەزيدەنت پارا العانى، بيلىگىن اسىرا پايدالانعانى جانە كوممەرتسيالىق كومپانيالارعا زاڭسىز ىقپال ەتكەنى ءۇشىن ايىپتى دەپ تانىلدى. ايىپتاۋشى 66 جاستاعى پاك كىن حەگە 30 جىل جانە 110 ملن دوللار ايىپپۇل سۇراعان ەدى.

ەكس-پرەزيدەنت تاعىلعان ايىپتاردىڭ بارلىعىن جوققا شىعاردى. ول سوتقا كەلگەن جوق. سوت وتىرىسى تەلەارنادا تىكەلەي ەفيردە كورسەتىلدى.

ءبىر جىل بۇرىن، 2017 جىلدىڭ 10 ناۋرىزىندا وڭتۇستىك كورەيانىڭ كونستيتۋتسيالىق سوتى پاك كىن حەنى پرەزيدەنت قىزمەتىنەن الۋ تۋرالى شەشىم قابىلدادى. يمپيچمەنتتى 2016 جىلى جەلتوقساندا وڭتۇستىك كورەيا پارلامەنتى جەمقورلىققا قاتىستى داۋدان سوڭ جاريالاعان.

وڭتۇستىك كورەيا پرەزيدەنتىنىڭ بالا كەزدەگى قۇربىسى چحۆە سۋن ءسيلدى مەملەكەت باسشىسىنا ىقپال ەتتى دەپ ايىپتاعان. يمپيچمەنتكە اكەلگەن جانجال سودان باستالدى. 2018 جىلى اقپاندا سۋن سيل 20 جىلعا سوتتالدى.

ول ەلدەگى ءىرى كومپانيالاردى، سونىڭ ىشىندە Samsung كورپوراتسياسىن ءوزىنىڭ كوممەرتسيالىق ەمەس قورىنا (شامامەن 70 ملن دوللار) اقشا اۋدارۋعا ماجبۇرلەپ، قاراجاتتى جەكە ماقساتتارىنا جاراتقان.

ۇقساس جاڭالىقتار

Back to top button