«التىن قالام-2017»: ۇزدىك قالامگەرلەر انىقتالدى

جازۋشىلار اراسىندا وتكەن «التىن قالام – 2017» بايقاۋى اياقتالىپ، ۇزدىك شىعارمالار انىقتالدى، دەپ حابارلايدى قازاقپارات.

بايقاۋعا ءار جانر بويىنشا بەس شىعارمادان ەنگىزىلدى. بيىل ۇيىمداستىرۋ كوميتەتىنىڭ جانە قازىلار القاسى قۇرامىندا دوسىم ساتپاەۆ، ايدوس سارىم، ارمان شوراەۆ، راسۋل جۇمالى، كەنجە جۇمان ۇلى، قۋات دومباي، ايگەرىم رايىمقۇلوۆا، بەكنۋر قيسىقوۆ، تاتيانا فيليپچيك، نۇرجان مۇحامەدجانوۆا بولدى.

بايقاۋعا قازاق جانە ورىس تىلدەرىندە جازىلعان 1076 جۇمىس قابىلدانعان. بايگەگە قازاقستان عانا ەمەس، اقش، گەرمانيا، ۋكراينا، رەسەي، يزرايل جانە بەلارۋس ەلىندە تۇراتىن اۆتورلار دا قاتىسقان. بيىل العاش رەت تاعايىندالعان مەتسەنات ەسەنقۇل مامانوۆ اتىنداعى سىيلىق الاشوردا تاقىبىرىن قامتىعان ۇزدىك تۋىندىعا بەرىلدى.

باس جۇلدە رەتىندە تاعايىندالعان 1 ملن تەڭگەنى تاريحشى، جازۋشى استانالىق ءامىرجان الپەيىسوۆ يەلەندى. ال، بالالار جازۋشىلارىنا ارنالعان «دارابوز» بايقاۋىنىڭ باس جۇلدەسىن جانە 1 ملن تەڭگەنى جازۋشى قاراعاندىلىق توكەن الجانتەگى جەڭىپ الدى.

«بيىلعى جۇلدە ءبىز ءۇشىن ەرەكشە بولدى. ولاي دەيتىن سەبەبىمىز، «الاش» پارتياسىنىڭ قۇرىلعانىنا 100 جىل تولۋىنا وراي، «الاشورداعا 100 جىل» اتالىمى جاريالاندى. ساتيرا جانرى بيىلدان باستاپ جازۋشى، ساتيريك، اۋدارماشى ەسەنجول دومباي اتىنداعى «جىلدىڭ ۇزدىك ساتيراسى» بولىپ وزگەرتىلدى.

سونىمەن قاتار، بۇعان دەيىن 11 رەت وتكىزىلگەن بالالار جازۋشىلارىنا ارنالعان حالىقارالىق «دارابوز» بايقاۋى بيىل ءبىرىنشى رەت «التىن قالام» ادەبي جۇلدەسى اياسىندا ءوتتى. بۇل بالالار شىعارماسىن قامتىعان تۋىندىلاردىڭ سانىن عانا ەمەس، ساپاسىنىڭ دا ارتۋىنا سەپتىگىن تيگىزدى. ءبىزدىڭ akalam.kz سايتى ارقىلى ءاربىر شىعارما ءوز وقىرمانىن تاپتى دەپ ويلايمىز»، – دەدى «التىن قالام» ادەبي جۇلدەسى ۇيىمداستىرۋ كوميتەتىنىڭ ديرەكتورى كەنجە جۇمان ۇلى.

 

ۇقساس جاڭالىقتار

Back to top button