كۇرىش قاۋىزى كادەگە جاراتىلماق

سىر ءوڭىرىنىڭ عالىمدارى قۇرىلىس جانە مۇناي وندىرىسىندە ەنەرگيا جانە رەسۋرس ۇنەمدەيتىن تەحنولوگيالار ويلاپ تاپتى. تىنىمسىز زەرتتەۋلەردىڭ ناتيجەسىندە كۇن ساۋلەسىن پايدالانىپ، بەتون بۇيىمدارىن تەز ءارى بىركەلكى كەپتىرۋگە بولاتىنىن دالەلدەپ شىقتى. سونداي-اق، كۇرىش پەن مۇنايدىڭ قالدىعىن پايداعا جاراتۋدىڭ تىڭ جولى تابىلدى.

جىل سايىن قىزىلوردا وبلىسىندا شامامەن 40 مىڭ توننا كۇرىش قاۋىزى وندىرىستىك قالدىق رەتىندە بوسقا قالاتىن. ءوڭىر عالىمدارى كۇرىش قاۋىزىن كادەگە جاراتىپ، قۇرىلىس ماتەريالدارىن جاساۋدى ۇسىنىپ وتىر. اعاش قالدىقتارىنىڭ ورنىنا قاراپايىم كەبەكتى پايدالانىپ، اربوليت جاساۋعا بولادى. بۇل ءادىس جەڭىل بەتون وندىرىسىندەگى ءداستۇرلى تەحنولوگيامەن سالىستىرعاندا ءبىرشاما ارزان ءارى ەكولوگيانى ساۋىقتىرۋدا پايداسى وراسان.               «جەرگىلىكتى ارزان شيكىزاتتاردى قولدانامىز. ياعني جىلۋ ورتالىعىنىڭ ك ۇلى، سونىمەن قاتار ءارتۇرلى حيميالىق قوسپالار، سۇيىق شىنى، كالتسي ءحلوريدى پايدالانىلادى. سولاردىڭ مولشەرىن ءبىز ەكى ەسە ازايتىپ، ءاربوليتتىڭ وزىندىك باعاسىن تومەندەتتىك»،  – دەيدى تەحنيكا عىلىمدارىنىڭ دوكتورى ساكەن ۇدەرباەۆ.

ال تەحنيكا عىلىمدارىنىڭ كانديداتى ءنابي داۋجانوۆ تەمىربەتون بۇيىمدارىن ءوندىرۋشى كاسىپورىندار شىعىنىن ازايتۋدىڭ جولىن ۇسىنىپ وتىر. بەتون قۇيماسىن كەپتىرۋ كەزىندە كۇن ەنەرگياسى پايدالانىلادى. ول ءۇشىن عالىم ارنايى گەليوقاقپاق ويلاپ تاپقان. «گەليوقاقپاقتىڭ ءتورت جاعىنا ءتورت جاقتاۋ ورناتىلادى دا، ەكىقاباتتى پوليەتيلەندىك پليونكا تارتىلادى. ەكى پوليەتيلەندىك پليونكانىڭ بەلگىلى اراقاشىقتىعى بار. ەگەر ول ساقتالماسا، بەرىلەتىن جىلۋدىڭ مولشەرى وزگەرۋى مۇمكىن. سول ارقىلى ارنايى بەكىتكىش ق ۇلىپتار ارقىلى بەكىتىلىپ، فورمالار قاتايتىلادى»، – دەيدى ءنابي داۋجانوۆ.

جەرگىلىكتى عالىمدار مۇناي بۇرعىلاۋ كەزىندە شىعاتىن قالدىقتاردى دا پايدالى ىسكە باعىتتاۋعا بولاتىنىن ايتادى. ادەتتە توننالاپ كومىر شىعىندالاتىن كەرامزيت وندىرىسىنە ەندى قارا التىن قالدىقتارىن قولدانعان ءجون دەيدى ولار. «الىنعان تەحنولوگيانى ءبىز ورال قالاسىنداعى كەرامزيت زاۋىتىندا تاجىريبەلىك سىناقتان وتكىزدىك. ول زاۋىتتا اكرەديتتەلگەن زەرتحانا بار. سول زەرتحانا ءبىز العان كەرامزيتتىڭ قۇرامىنا سايكەستىك سەرتيفيكاتىن بەردى. ياعني مەملەكەتتىك ستاندارتقا بارلىق فيزيكالىق-مەحانيكالىق قاسيەتتەرى بويىنشا ساي كەلەدى دەگەن ءسوز»، – دەيدى تەحنيكا عىلىمدارىنىڭ كانديداتى روزا نارمانوۆا.

«قورقىت اتا» اتىنداعى قىزىلوردا مەملەكەتتىك ۋنيۆەرسيتەتىنىڭ عالىمدارى وقۋ ورداسىنىڭ زەرتحاناسىندا بىرقاتار تىڭ تەحنولوگيانى ءالى دە سىناقتان وتكىزۋدە. ولاردىڭ ماقساتى بىرەۋ – ەنەرگيا جانە رەسۋرس ۇنەمدەۋ تاسىلدەرىن جەتىلدىرىپ، وتاندىق ءوندىرىستىڭ وركەندەۋىنە جول اشۋ.

 

 

ۇقساس جاڭالىقتار

Back to top button