قۇراما شتاتتار مەن تۇركيا ۆيزا بەرۋدى توقتاتتى

جەكسەنبى كۇنى انكاراداعى اقش ەلشىلىگى تۇركيا ازاماتتارىنا يمميگرانتتىقتان باسقا، ۆيزانىڭ بارلىق ءتۇرىن بەرۋدى ۋاقىتشا توقتاتاتىنىن مالىمدەدى. بىرنەشە ساعات وتكەننەن كەيىن، ءدال وسىنداي مالىمدەمەنى ۆاشينگتونداعى تۇرىك ەلشىلىگى جاسادى.

اقش ستامبۇلدا امەريكالىق كونسۋلدىق قىزمەتكەرىنىڭ ۇستالۋىنا جاۋاپ رەتىندە، تۇرىك ازاماتتارىنا ۆيزا بەرۋدى توقتاتتى. امەريكا ەلشىلىگى تاراتقان مالىمدەمەدە «اقش ديپلوماتيالىق قىزمەتكەرلەرىنىڭ قاۋىپسىزدىگىنە كەپىلدىك بەرىلمەيىنشە، ۆيزا بەرىلمەيدى» دەلىنگەن.

امەريكا-تۇرىك قارىم-قاتىناسى ۆاشينگتوننىڭ سيريالىق كۇردتەرگە قولداۋ كورسەتۋىنەن كەيىن، كۇرت ناشارلادى. سيريالىق كۇردتەر تۇركياداعى كۇردىستاننىڭ جۇمىسشى پارتياسىنىڭ وداقتاستى. ال بۇل ۇيىمدى انكارا تەرروريستىك ۇيىمداردىڭ قاتارىنا جاتقىزادى.

تۇركيا ناتو-نىڭ مۇشەسى بولا تۇرا، رەسەيدەن زىمىران-زەنيت كەشەنىن ساتىپ العانى ءۇشىن ءارى اقش-تا تۇراتىن فەتحۋللاح گۇلەندى ەكستراديتسيالاۋ ارەكەتىنەن تۇك شىقپاعاننان كەيىن دە، ەكى ەلدىڭ ديپلوماتياسىنا سىزات ءتۇستى. انكارا ءدىني ۋاعىزداۋشى گۇلەندى 2016 جىلدىڭ جازىندا توڭكەرىس جاساماق بولدى دەپ ايىپتايدى.

ستامبۇلدا ۇستالعان امەريكالىق ديپلومات گۇلەنمەن قۇپيا بايلانىستا بولدى، تىڭشىلىقپەن اينالىستى دەپ ايىپتالىپ وتىر. اقش مەملەكەتتىك دەپارتامەنتى بۇل ايىپتاۋلاردى دالەلسىز دەيدى.

 

Back to top button