Балалар арасында артық салмақ пен метаболизмдік бұзылыстардың профилактикасы Астанада өткен «Саламатты мектеп» бірінші республикалық форумында талқыланған негізгі тақырыптардың бірі болды, деп хабарлайды turkystan.kz.
2024 жылғы мультииндикаторлы кластерлік зерттеудің деректеріне сәйкес 5–9 жастағы балалардың 23,2%-ында артық дене салмағы анықталған. Бұл – шамамен әрбір төртінші бала.
Проблеманы мектеп жасынан бастап анықтап, алдын алу маңызды. Балалық шақтағы артық салмақ болашақта 2-типті қант диабеті мен жүрек-қантамыр ауруларының даму қаупінің жоғарылауымен байланысты.
2025 жылы 18 жасқа дейінгі балалар мен жасөспірімдердің арасында 2-типті қант диабетінің 1104 жағдайы тіркелді, оның 237-сі алғаш рет анықталған.
Профилактика баланың күнделікті ортасынан басталады. Ол теңгерімді тамақтануды, жеткілікті дене белсенділігін, салауатты әдеттерді қалыптастыруды және қауіп факторларын уақтылы бағалауды қамтиды.
Сондықтан «Саламатты мектеп» шеңберінде мектептегі тамақтанудың сапасына, дене белсенділігіне қолжетімділікке, аурулардың профилактикасына, сондай-ақ мектеп, отбасы және денсаулық сақтау жүйесінің өзара іс-қимылына ерекше көңіл бөлінеді.
Бұл ретте артық салмақтың профилактикасы баланы стигматизациялауға әкелмеуі керек екенін есте ұстаған жөн. Баланы мазақ етуге, кінәлауға және оның салмағын көпшілік алдында талқылауға жол берілмейді. Ересектердің міндеті – баланы сынау емес, салауатты өмір салты оның күнделікті өмірінің табиғи бөлігіне айналатын жағдай жасау.
Баланың денсаулығы бір реттік акциямен немесе дәрігерге бір рет барумен қалыптаспайды. Бұл – баланың күн сайын білім алып, тамақтанып, қимылдап, өсіп жатқан ортасының нәтижесі.
