Ирландиялық танымал актриса Бренда Фрикер 81 жасында қайтыс болды. Ол көрерменге "Үйде жалғыз қалғанда 2: Нью-Йоркте адасу" фильміндегі көгершіндерге қамқорлық жасайтын әйелдің рөлі арқылы кеңінен танылған, деп хабарлайды turkystan.kz.
Актрисаның өмірден өткені туралы оның ұзақ жылдар бойғы агенті Фил Белфилд хабарлады.
Ресми мәлімдемеге сәйкес, Бренда Фрикер 2026 жылғы 17 шілде күні таңертең қысқа уақытқа созылған сырқаттан кейін көз жұмған. Өмірінің соңғы сәтінде оның жанында жақындары болған.
Бренда Фрикер әлемдік кино тарихында «Оскар» сыйлығын жеңіп алған алғашқы ирландиялық әйел ретінде қалды. Ол бұл марапатқа Джим Шериданның "Менің сол аяғым" драмасындағы рөлі үшін ие болған.
Актриса фильмде сал ауруына шалдыққан суретші әрі жазушы Кристи Браунның анасы миссис Браунның бейнесін сомдады. Оның бұл жұмысы кино мамандары мен көрермендер тарапынан жоғары бағаланды.
Фил Белфилд Бренда Фрикерді ирландиялық актерлік өнердің көрнекті өкілі, ерекше харизмасы мен сирек таланты бар тұлға деп атады.
"Бренданы білу, жақсы көру және онымен ұзақ жылдар бойы бірге жұмыс істеу мен үшін үлкен мәртебе болды. Оның қазасынан кейін дүние босап қалғандай сезіледі", – деді агент.
Бренда Фрикердің шығармашылық жолы шамамен 60 жылға созылды. Осы уақыт ішінде ол Ирландия, Ұлыбритания және Голливудтағы театр қойылымдарына, кинофильмдер мен телевизиялық жобаларға қатысты.
Актриса өз буынының ең беделді әрі танымал өнер иелерінің бірі саналды.
