Шымкент қаласында көшедегі термометрлер күннің аптап ыстығында +60 градустан жоғары температураны көрсетіп жатыр. Тіпті күн астында небәрі бірнеше минут тұрған құрылғылардың бірі жоғары температураға шыдамай істен шыққан, деп хабарлайды turkystan.kz.
Otyrar.kz сайтының мәліметінше, әлеуметтік желілерде көшедегі термометрлердің +66 градусқа жуық көрсеткішті көрсетіп тұрған видеолары кеңінен тарап жатыр. Алайда бұл ресми ауа температурасы емес, күннің тікелей сәулесі түскен жердегі беткі қабат пен ауа температурасы екенін атап өткен жөн. Метеорологтар ауа температурасын арнайы жағдайларда өлшейді.
Аптап ыстыққа байланысты қаладағы қалыпты өмір ырғағы айтарлықтай өзгерген. Күннің ең ыстық уақытында көшелер босап қалады. Тұрғындар аса қажет болмаса сыртқа шықпауға тырысып, көлеңкеде жүреді, бас киім киіп, өздерімен бірге міндетті түрде су алып жүреді. Себебі күн астында аз уақыттың өзінде қызып кету, бас ауруы және жалпы халдің нашарлауы мүмкін.
Жедел медициналық жәрдем қызметінің мәліметінше, әзірге шақыртулар санының жалпы өсуі байқалмайды. Күніне шамамен 2300 шақырту түседі. Дегенмен дәрігерлер созылмалы аурулары асқынған, қан қысымы көтерілген, жүрек-қан тамырлары және өкпе ауруларына байланысты жүгінетін науқастардың көбейгенін айтып отыр.
Синоптиктердің болжамынша, оңтүстік өңір тұрғындары үшін аптап ыстық алдағы күндері де сақталады. Жауын-шашын өте аз болады, ал ауа температурасы жоғары деңгейде қала береді.
Ал еліміздің солтүстік өңірлерінде тұрғындарды көптен күткен салқын ауа райы күтіп тұр. Солтүстік-батыс циклонының әсерінен жаңбыр жауып, найзағай ойнайды, кей жерлерде бұршақ жаууы мүмкін. Жауын-шашынмен бірге ауа температурасы да айтарлықтай төмендейді.
