Ұзақ пойыз сапарына шыққанда азық-түлікті дұрыс таңдау өте маңызды. Инфекционист дәрігер Давид Марголистің айтуынша, дұрыс сақталмаған тағамдар тамақтан улану қаупін едәуір арттырады, деп хабарлайды turkystan.kz REGIONS басылымына сілтеме жасап.
Маманның сөзінше, жолға тез бұзылатын тағамдарды алмау керек. Әсіресе жаз кезінде жоғары температураның әсерінен бактериялар өте жылдам көбейеді. Сондықтан майонез қосылған салаттар, қайнатылған тауық еті, сүт өнімдері мен піскен шұжықтарды алып жүруден бас тартқан жөн.
Дәрігердің айтуынша, жолға пісірілген тауық етін алуға болады. Алайда оның толықтай дайындалғанына көз жеткізу қажет – еттің іші қызғылт немесе шикі болмауы тиіс. Сонымен қатар бөлме температурасында мұндай тағамды 3–4 сағаттан артық сақтауға болмайды. Ал ыстық вагонда бұл уақыт 1,5–2 сағатқа дейін қысқарады. Сондықтан тауық етін сапардың алғашқы сағаттарында жеп қою ұсынылады.
Маман майонез қосылған салаттарды ерекше қауіпті тағамдардың қатарына жатқызды. Оның айтуынша, ауа температурасы +23 градустан жоғары болған жағдайда мұндай тағамдарда 40 минуттың ішінде-ақ стафилококк бактериялары көбейе бастайды.
Сондай-ақ дәрігер қайнатылған шұжықтарды, үй жағдайында дайындалған паштеттерді, сүзбе өнімдерін, сорпа мен бұқтырылған тағамдарды жолға алмауға кеңес берді. Олар жылы жерде тез бұзылып, улануға себеп болуы мүмкін.
Бұған қоса, өткір иісі бар балық консервілерін де пойызға алып шықпаған дұрыс. Өйткені олар жабық вагонда басқа жолаушыларға жайсыздық тудыруы мүмкін.
Мамандар сапар кезінде ұзақ сақталатын тағамдарға – кептірілген жемістерге, жаңғақтарға, кепкен нанға, қатты жемістер мен көкөністерге және герметикалық қаптамадағы өнімдерге басымдық беруге кеңес береді.
