Қазақстандық шахматшы Бибісара Асаубаева әйелдер арасындағы беделді Norway Chess турнирінің жеңімпазы атанды, деп хабарлайды turkystan.kz.
Ол жеңісті тоғызыншы турда украиналық шахматшы Анна Музычукке қарсы партиядан кейін қамтамасыз етті. Классикалық партия тең аяқталған соң, қарсыластар армагеддон ойнады. Дегенмен осы кездесуде жинаған ұпай Асаубаеваға турнир аяқталуына бір тур қалғанда бірінші орынды мерзімінен бұрын иеленуге жеткілікті болды.
Соңғы турдың алдында Бибісара Асаубаева 16,5 ұпаймен турнир кестесінде сенімді түрде көш бастап тұр. Оның ең жақын қарсыласы Анна Музычук 11,5 ұпай жинаған.
Одан кейінгі орындарда үндістандық шахматшы Дивья Дешмух пен Қытай өкілі Чжу Цзиньэр орналасқан. Екеуінің де еншісінде 10 ұпайдан бар.
Енді Асаубаева соңғы турды жарыстың мерзімінен бұрын жеңімпазы ретінде өткізеді. Соңғы партияның нәтижесіне қарамастан, оның жалпы есептегі бірінші орны өзгермейді.
2026 жыл Бибісара Асаубаеваның мансабындағы ең табысты кезеңдердің біріне айналды. Бұған дейін ол үміткерлер турнирінде екінші орын алып, Қазақстан шахматшылары арасындағы ең үздік нәтижені көрсеткен еді.
