Адамдар әдетте өз әулетінің тарихын архивтер, ДНҚ-тесттер және генеалогиялық деректер арқылы зерттейді. Мысалы, Конфуцийдің шежірелік ағашы 80-нен астам ұрпақты қамтиды және шамамен 3 мың жылға созылады. Алайда қазіргі ғылыми бағалаулар адамзат тарихы бұдан әлдеқайда ұзақ екенін көрсетеді: Homo sapiens шамамен 300 мың жыл бұрын пайда болған, деп хабарлайды turkystan.kz.
Осы уақыт аралығында қанша ұрпақ алмасқанын есептеу үшін ғалымдар «ұрпақ ұзақтығы» деген көрсеткішті пайдаланады. Бұл адамдардың орта есеппен қанша жаста бала сүйетінін білдіреді. Зерттеулерде бұл көрсеткіш әртүрлі: мысалы, Исландияда соңғы 300 жылда ол шамамен 30,3 жыл болса, Еуропада ХХ ғасырдың екінші жартысында ер адамдар үшін орташа 29 жылға жуық болған.
Генетик Мэтью Хан тарихи деректер мен мутацияларды талдай отырып, соңғы 250 мың жылдағы орташа ұрпақ ұзақтығын шамамен 26,9 жыл деп есептейді. Осы есепке сүйенсек, адамзат тарихында шамамен 11 мыңнан астам ұрпақ ауысқан.
Басқа зерттеушілер ұрпақ ұзақтығын 24,6 жылдан 30 жылға дейінгі аралықта қарастырады. Бұл жағдайда адамзат тарихындағы ұрпақ саны шамамен 10 мың мен 12 мыңның арасында болуы мүмкін.
Ғалымдардың айтуынша, бұл есептер нақты бір саннан гөрі эволюцияның ауқымын түсінуге көмектеседі және адамзат тарихының қаншалықты терең екенін көрсетеді.
