Кей адамдарда сағызды үздіксіз шайнау бас ауруынан бастап, жақ буынына қатысты мәселелерге дейін түрлі жағымсыз салдарға әкелуі ықтимал, деп хабарлайды turkystan.kz.
Балалар дәрігері-стоматолог Екатерина Шауланың айтуынша, сағыз тамақтан кейін пайдалы болуы мүмкін. Ол сілекейдің көбірек бөлінуіне ықпал етіп, ауыз қуысын тағам қалдықтарынан тазартады және тістерге зиян келтіретін қышқылдарды ішінара бейтараптандырады. Алайда маңызды шарт бар: сағыздың құрамында қант болмауы керек.
Сонымен қатар, сағызды тым ұзақ шайнауға болмайды.
«Тамақтан кейін сағыз шайнаудың оңтайлы уақыты – 10-15 минут. Егер жақ сүйегінде сыртыл пайда болса, ауыз ашқанда ауырсыну сезілсе немесе самай-төменгі жақ буынында мәселе болса, қосымша жүктеме жағдайды ушықтыруы мүмкін. Сондай-ақ бруксизмге – тісті қатты қысу немесе шықырлату әдетіне бейім адамдарға және тіс эмалінің шамадан тыс тозуы байқалатын жандарға сақ болған жөн», – деді маман.
Бұдан бөлек, танымал тәттілендіргіштердің де қаупі бар. Мысалы, сорбитолды шамадан тыс қолдану ішекте жайсыздық тудырып, іш өтуге себеп болуы мүмкін.
Дәрігердің сөзінше, балалар мен жасөспірімдерде сағызды үздіксіз шайнау бет бұлшықеттерінің шамадан тыс керілуінен созылмалы бас ауруына алып келуі ықтимал.
Ал брекет тағатын адамдар тағы бір мәселеге назар аударуы қажет: сағыз брекет жүйесіне жабысып қалып, оның бөліктерін зақымдауы мүмкін.
