Жастардың жүрегі кенеттен тоқтап қалуы көбіне тұқым қуалайтын генетикалық мутациялармен байланысты болуы мүмкін. Мұндай қорытындыға АҚШ-тағы Седарс-Синай медициналық орталығының ғалымдары келді. Зерттеу нәтижелері JACC: Clinical Electrophysiology ғылыми журналында жарияланды, деп хабарлайды turkystan.kz.
Кенеттен жүрек тоқтауы жүректің электрлік белсенділігі бұзылған кезде пайда болады. Соның салдарынан жүрек қанды ағзаға тиімді айдай алмай қалады. Бұл жағдай өте жылдам дамиды және дер кезінде медициналық көмек көрсетілмесе, көп жағдайда өлімге әкеледі.
Зерттеу барысында ғалымдар кенеттен жүрек тоқтауынан аман қалған үш мыңнан астам адамның геномын талдады. Мақсат – аурудың тұқым қуалайтын ДНҚ өзгерістерімен қаншалықты байланысты екенін анықтау.
Нәтижесінде жүрек ырғағының қауіпті бұзылыстарының даму қаупін арттыратын 15 ген анықталды.
Генетикалық факторлардың әсері әсіресе жастар арасында айқын байқалған. Жасы 29-дан кіші қатысушылардың шамамен 10 пайызынан қауіпті мутациялар табылған. Ал 70 жастан асқан адамдар арасында мұндай өзгерістер небәрі 3 пайыз жағдайда ғана кездескен.
Ғалымдардың айтуынша, бұл кенеттен жүрек тоқтауының себептері жас ерекшелігіне қарай өзгеретінін көрсетеді. Жастарда мұндай жағдай көбіне туа біткен жүрек ақаулары мен тұқым қуалайтын мутацияларға байланысты болса, егде жастағы адамдарда негізгі қауіп көзі – жүрек-қан тамырлары аурулары. Олардың қатарына қан тамырларының бітелуі, жүректің ишемиялық ауруы және жас ұлғаюына байланысты басқа да патологиялар жатады.
Зерттеу авторлары бұл жаңалық кенеттен жүрек тоқтауының алдын алу тәсілдерін қайта қарауға мүмкіндік береді деп есептейді. Отбасында осындай жағдайлар болған адамдарға генетикалық тексеруден өту ұсынылады.
Мұндай талдау қауіп деңгейін ертерек анықтап, жүрек жағдайын тұрақты бақылауға, қажет болған жағдайда дер кезінде ем қабылдауға немесе өмір салтын өзгертуге көмектесуі мүмкін.
