Швеция парламенті (Риксдаг) осы елдегі натурализация рәсімін өзгертетін түзетулер пакетін бекітті, деп хабарлайды turkystan.kz.
Скандинавиядағы корольдік, ұзақ уақыт бойы мигранттар үшін «тыныш айлақ» саналған ел, ресми түрде қатаң интеграция саясатына көшуде. Қабылданған заңға сәйкес, швед паспортын алуға үміткерлерге қойылатын талаптар барлық негізгі бағыттар бойынша — елде тұру мерзімінен бастап жеке табыс деңгейіне дейін күшейтіледі.
Бұған дейін шетел азаматына елде бес жыл тұру жеткілікті болса, енді бұл мерзім сегіз жылға дейін ұзартылды.
Осылайша, Стокгольм натурализация мәселесінде өз заңнамасын ЕО-дағы ең консервативті елдермен үйлестіруде.
Үміткер сондай-ақ швед экономикасына өз пайдасын дәлелдеуі тиіс: ең төменгі жылдық табыс 241,8 мың кронды (шамамен 22 мың АҚШ доллары) құрауы керек. Сонымен қатар, үміткердің салықтар немесе әлеуметтік төлемдер бойынша қарызы болмауы тиіс.
Швецияның қазіргі тарихында алғаш рет міндетті кешенді тест енгізілуде. 16 жастан асқан адамдар үшін енді швед паспортын алу тек швед тілін толыққанды жұмыс істеу мен қарым-қатынас жасауға жеткілікті деңгейде меңгергенін растағаннан кейін ғана мүмкін болады. Бұған қоса, қоғамтану негіздерін, оның ішінде демократиялық құндылықтар мен конституциялық құқықтарды түсіну талап етіледі.
— Азаматтық — бұл тек құқық емес, қоғам алдындағы міндет, — деп атап өтеді бастама авторлары.
Реформаның ең көп талқыланған тұсы — Риксдагтың заңға өтпелі кезең енгізбеу туралы шешімі болды. Жаңа ережелер 2026 жылғы 6 маусымнан бастап күшіне енеді.
Айта кетерлігі, бұл талаптар бірнеше жыл бұрын өтініш берген, бірақ әлі Көші-қон қызметінен жауап алмаған шетелдіктерге де қолданылады.
