Жанболат пен Жазираның ұлы Қазбек әлеуметтік желіде Дубайда бастан өткерген қиын жағдай туралы жазды, деп хабарлайды turkystan.kz.
Оның айтуынша, олар тұрған жердің маңына ракета түсіп, бірнеше күн бойы қауіпті жағдайда болған.
«Бір сағаттан соң, біз тоқтаған үйдің артындағы қонақүйге аспаннан ракета түседі. Ол уақытта біз үйде болуымыз керек еді. Бірақ достарымызбен бас қосайық деп, осы жерде қалдық. Сол сәттен бастап жарылыстар бірінен соң бірі болып кетті. Заттарымызды алмай, бар киімімізбен қазақ достарымыздың үйінде 3 күн түнедік», – деп жазды ол.
Бұл күндер олардың отбасы үшін үлкен стресс болғанын айтады.
«Сол 3 күн отбасымыз үшін стресс болды. Көз алдымызда алыстан ракеталар жарылды, жерге түсті, сағат сайын үстімізден гуілдеп бірдеңелер ұшты. Тойға дейін азуымыз керек еді деп едік. Уайыммен-ақ азып кеттік. Мұндай сәтте ең қиыны – дұрыс шешім қабылдау», – деді ол.
