«Оксфорд Юнайтед» әйелдер академиясында ойнаған 15 жастағы Амелия Эплин «Фулхэмнің» өзімен қатарлас қыздар командасына қарсы матч кезінде есінен танып, кейін қайтыс болды. Дәрігерлер шұғыл көмек көрсетуге тырысқанымен, жас спортшыны аман алып қалу мүмкін болмады, деп хабарлайды turkystan.kz.
Қайғылы оқиға 8 наурыз күні «Оксфорд Юнайтедтің» жаттығу базасында, екі клубтың әйелдер академиялары арасындағы кездесу кезінде болған. Қолда бар мәліметке сәйкес, Амелия Эплин алаң үстінде кенеттен есінен танып қалған. Екі клубтың да медицина қызметкерлері дереу алғашқы көмек көрсетуге кірісіп, оқиға орнына жедел қызмет өкілдері шақырылған. Алайда реанимациялық шаралардың бәрі нәтиже бермей, қыз қайтыс болды.
«Біз академиямыздың ойыншысы, 15 жастағы Амелия Эплиннің қайтыс болғанын зор күйзеліспен хабарлаймыз. “Оксфорд Юнайтедтің” барлық қызметкерлері атынан Амелияның отбасына, достарына, командадағы әріптестеріне және жаттықтырушыларына көңіл айтамыз. Сонымен қатар “Оксфорд” пен “Фулхэмнің” медицина қызметкерлеріне, сондай-ақ жедел қызмет өкілдеріне ресми түрде алғыс білдіреміз. Клуб Амелияның отбасына, ойыншыларға, жаттықтырушыларға және осы қайғылы оқиғадан зардап шеккен қызметкерлерге жан-жақты қолдау көрсетеді. Біз осы аса ауыр кезеңде отбасының жеке өміріне құрметпен қарауды сұраймыз», - деп жазылған «Оксфорд Юнайтед» клубының баспасөз қызметі ресми мәлімдемесінде.
Осы жағдайға байланысты 8 наурызға жоспарланған «Оксфордтың» негізгі әйелдер командасының «Реал Бедфордқа» қарсы матчы шұғыл түрде кейінге қалдырылды. Клуб басшылығы қайғылы оқиғаның куәсі болғандардың бәріне — жас футболшыларға, жаттықтырушылар штабына және академия қызметкерлеріне — білікті психологиялық көмек ұйымдастыру туралы шешім қабылдады. Олар өз командаласының қазасын көз алдында көріп, ауыр күйзеліс кешірген.
Қазіргі уақытта Амелия Эплиннің өлім себебі ресми түрде анықталған жоқ. Оқиғаның мән-жайы алдағы тергеу барысында нақтыланады.
