Қазір Жерге қараған №4 366 күн дақтары тобы ерекше белсенділік танытып отыр. 5 ақпан күндізгі уақытқа қарай бұл аймақта M және X класындағы 58 қуатты жарқыл тіркелген. Ғарыш мониторингі деректеріне сәйкес, 4 366 тобы әлі де аса белсенді, деп хабарлайды turkystan.kz.
РҒА-ның Ғарыштық зерттеулер институты жанындағы Күн астрономиясы зертханасының хабарлауынша, 58 күшті жарқыл бұл топты рекордтық көрсеткішке жақындатып отыр. XXI ғасырдағы әзірге ең жоғары нәтиже 2024 жылдың мамырында байқалған №3 664 тобына тиесілі: ол кезде 64 жарқыл тіркеліп, соңғы 20 жылдағы ең қуатты магнит дауылы 11-12 мамырда болған.
Айта кетерлігі, қазіргі белсенділік аясында тіпті X8.1 деңгейіндегі аса қуатты супер-жарқыл болғанымен, оның Жерге тікелей әсері әзірге шектеулі болып отыр. Мұның себебі Күндегі процестердің ерекшелігінде. Ғалымдардың айтуынша, №4 366 аймағындағы жарқылдар түсініксіз себептермен тәждік масса лақтырыстарымен (CME) қатар жүрмей жатыр. Ал дәл осы плазма бұлттары болмаса, Жердің магнитосферасына күшті соққы беру ықтималдығы айтарлықтай төмендейді.
Мамандардың болжамынша, белсенді аймақ тағы бір-екі тәулік бойы геоэффективті жағдайда, яғни Жерге қараған күйде қалады. Осы кезеңде магнитосфера үшін қауіп сақталады. Егер осы уақыт ішінде Жер бағытына қарай кемінде бір ірі плазма лақтырысы орын алса, G4 немесе G5 деңгейіндегі өте күшті магниттік дауылдар болуы мүмкін.
