Оралда полиция халықаралық іздеуде жүрген азаматты қолға түсірді, деп хабарлайды turkystan.kz.
Қазақстан Республикасы Ішкі істер министрлігі өткен жылдардағы қылмыстың ашылуын жіті бақылауда ұстап отыр.
Атап айтқанда, 17 қаңтарда Оралда Батыс Қазақстан облысы полиция департаментінің экстремизмге қарсы іс-қимыл басқармасының қызметкерлері қылмыстық полиция басқармасымен бірлесіп, "Беркут" арнайы жасағының күштік қолдауымен 33 жастағы азаматты ұстады.
Анықталғандай, аталған азамат Орал қаласы аумағында жасалған ер адамды өлтіру дерегі бойынша аса ауыр қылмыс жасағаны үшін 2024 жылдан бері халықаралық іздеуде болған.
Қазіргі уақытта ұсталған тұлға уақытша ұстау изоляторына қамалды.
Аталған дерек бойынша қажетті тергеу әрекеттері жүргізілуде.
Ішкі істер министрлігі өткен жылдардағы ауыр және аса ауыр қылмыстарды ашу бойынша жүйелі жұмысты жалғастырып жатыр. Бұл жағдай — жазадан ешкім де құтыла алмайтынын көрсетеді.
