__باستى سلايدەرقوعام

وقو دارىگەرلەرى العاش رەت جۇرەك الماستىرۋ وتاسىن جاسادى

وڭتۇستىك قازاقستاندا بۇرىن سوڭدى مۇمكىن بولماعان جۇرەك وتالارى جاسالدى. بۇل تۋرالى وبلىستىق كارديولوگيا ورتالىعىندا دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ مالىمدەدى.

ونىمەن بىرگە تۇركيادان ارنايى كەلىپ شىمكەنتتە شەبەرلىك ساباعىن وتكىزگەن ىستامبۇل قالاسى اۋرۋحاناسىنىڭ ءبولىم مەڭگەرۋشىسى، مەديتسينا عىلىمدارىنىڭ دوكتورى، پروفەسسور بەلحام اكپينار، كارديوورتالىقتىڭ باس دارىگەرى، عىلىم دوكتورى سپانديار بەكجىگىتوۆ ءباسپاسوز ءماسليحاتىن وتكىزدى.

«ىستىق ىقىلاس تانىتقاندارىڭىزعا راحمەت! سىزدەرمەن تاجىريبە الماسۋعا، مۇمكىندىكتەرىمدى كورسەتۋگە كومەكتەسكەن ازاماتتارعا ەرەكشە العىسىمدى بىلدىرگىم كەلەدى. ەكى كۇندە جۇرەكتىڭ قاقپاقشالار قۇرىلىمدارىن رەكونسترۋكتسيالاۋ مەن پروتەزدەۋ جانە ينتراوپەراتسيوندىق راديوجيىلىك ابلياتسيالاۋدى پايدالانا وتىرىپ اورتوكورونارلىق شۋنتتاۋ وتاسىن 5 ناۋقاسقا جاسادىق» دەپ ءسوز باستادى بەلحام اكپينار.

بۇل وتا جۇرەكتىڭ يشەميالىق اۋرۋىمەن قاتار، قاقپاقشالارىنىڭ زاقىمدانۋى انىقتالىپ، ىرعاعىنىڭ بۇزىلۋى اسقىنعان ناۋقاستارعا جاسالىنادى.

– تۇركيادان ارنايى كەلگەن بىلىكتى دارىگەر، پروفەسسور بەلحام اكپينارعا العىسىمىز شەكسىز. بۇل كاسىبي مامانداردىڭ ماقساتى وڭتۇستىك قازاقستان وبلىسىندا دارىگەرلەردىڭ بىلىكتىلىكتەرىن ارتتىرۋ، حالىقتىڭ دەنساۋلىعىن جاقسارتۋ، كۇردەلى وتالاردى دارىگەرلەرىمىزگە ۇيرەتۋ. بۇرىن مۇنداي وتالار الماتى مەن استاناداعى رەسپۋبليكالىق ورتالىقتاردا عانا جاسالىپ كەلگەن بولسا، وبلىستىق دەڭگەيدە العاش رەت قولعا الىندى. بۇل الەمنىڭ كەز كەلگەن دامىعان ەلىندە جاسالا بەرمەيتىن كۇردەلى وتا. ايتا كەتۋىمىز كەرەك، جاسالعان وتالاردىڭ بارلىعى دا مەملەكەت ەسەبىنەن قارجىلاندىرىلعان. تەگىن. دەگەنمەن، ءومىر ءبىر ورنىندا قالىپ قويمايدى. ءبىز بۇل ماماندارمەن كەلىسىمگە كەلدىك. ەگەر دارىگەرلەرىمىز تۇرىك ەلىنە بارىپ، بىلىكتىلىكتەرىن جەتىلدىرەتىن بولسا، جول شىعىندارىنان باسقاسىن، اس-اۋقاتىنان باستاپ، جاتاتىن ورنى مەن وقۋىنا دەيىنگى شىعىنداردى تۇگەل تۇركيا تاراپى ءوز مىندەتىنە الىپ وتىر. بۇل وبلىس دارىگەرلەرىنە بەرىلگەن مول مۇمكىندىك، ۇلكەن كومەك دەپ ويلايمىن. كەلەشەكتە مۇنداي كۇردەلى وتالاردى ءوزىمىزدىڭ دارىگەرلەرىمىز دە جاساي بەرەتىن بولادى، – دەدى مۇقان كەڭەسبەكۇلى.

«بۇل ءبىر ادامنىڭ قولىنان كەلەتىن وتا ەمەس، كەمىندە ءۇش دارىگەر قاتىسادى. وتانىڭ العاشقى كەزەڭىن ءبىزدىڭ قاتىسۋىمىزبەن بەلحام مىرزا جاسادى. ودان كەيىنگىسىن مەن جاسادىم، پروفەسسوردىڭ كەڭەسىمەن. ءبارىمىز ۇيرەندىك. وتاعا بايلانىستى سۇراقتارىمىزعا قاناعاتتانارلىق جاۋابىمىزدى الدىق. قاجەتتى دەرەكتەردى جازىپ الدىق. وقىپ، وڭ ناتيجە شىعارىپ، ءارى قاراي جالعاستىرا الاتىنىمىزعا سەنىمدىمىن. كوپشىلىكتىڭ كوزىنشە ۋادە دە بەرە الامىن. بۇگىن سونىڭ ايعاعى رەتىندە ءوزىمىز وتا جاسايتىن ءبىر ناۋقاستى وتاعا دايىنداپ جاتىرمىز» دەپ اعىنان جارىلدى كارديوحيرۋرگيا ءبولىمىنىڭ مەڭگەرۋشىسى باۋىرجان بايتورە.

سوڭعى ەكى جىلدا وبلىستىق كارديوورتالىقتا 620 جۇرەككە وتا جاسالىنىپتى، 2015 جىلى – 310, 2016 جىلى – 310. قازاقستاندا كارديوحيرۋرگيالىق وتا جاسايتىن 27 ورتالىق بار. سونىڭ ىشىندەگى الماتى قالاسىنداعى ا.سىزعانوۆ اتىنداعى ۇلتتىق عىلىمي حيرۋرگيا ورتالىعىندا بىلتىر 274 وتا جاسالىپتى. شىمكەنتتە بۇل كورسەتكىش 46-عا كوپ. جالپى، وبلىستىق كارديوورتالىقتا سوڭعى 7-8 جىلدا 3000 جۇرەككە اشىق وتا جاسالعان.

«دارىگەرلەرىمىز شەت ەلدەردە بىلىمدەرىن جەتىلدىرىپ، بىلىكتىلىكتەرىن ارتتىرعان. كۇردەلى وتالاردى مەڭگەرۋدە. ءتىپتى ولار جۇرەكتى اۋىستىرۋعا دا دايىن» دەيدى كارديوورتالىقتىڭ باس دارىگەرى سپانديار بەكجىگىتوۆ.

باس دارىگەردىڭ ايتۋىنشا، جۇرەك ىرعاعىنىڭ بۇزىلۋى – «جۇرەكشەلەردىڭ جىبىرى» حالىق اراسىندا كەڭىنەن تارالعان سوزىلمالى اۋرۋ ەكەن. اتالعان پاتولوگيا ايەلدەرمەن سالىستىرعاندا ەر ادامداردا 1,5 ەسە ءجيى كەزدەسەدى. جۇرەكشەلەردىڭ جىبىرىن ەمدەۋ قازىرگى زاماننىڭ كارديولوگياسى مەن كارديوحيرۋرگيا سالاسىندا قيىندىق تۋدىرىپ وتىر. ەڭ باستى قيىندىقتاردىڭ ءبىرى – كارديوگەندى ترومبوەمبوليالار ءجيى مي ينسۋلتتارىنىڭ تۋىنداۋىنا سەبەپ بولىپ، ناۋقاستاردىڭ ءومىر ءسۇرۋ ساپاسىن تومەندەتەدى. ايتىلعان ماسەلە بويىنشا جۇرەك قاقپاقشالارىنىڭ اقاۋى مەن جۇرەكشەلەردىڭ جىبىرىن كارديوحيرۋرگيالىق جولمەن بىرگە ەمدەۋ كۇردەلى وتالاردىڭ ءبىرى بولىپ تابىلادى. ال، بۇل ماستەر-كلاستىڭ ۇيىمداستىرىلۋ ماقساتى دا وسى –ناۋقاستاردى اۋرۋىنان ايىقتىرىپ، ساپالى ۇزاق ءومىر سۇرۋلەرىنە ىقپال ەتۋ.

Back to top button