Поляк ғалымдары күлгін түсті өсімдіктердің құрамындағы антоциан деп аталатын табиғи пигменттердің ағзаға ерекше әсерін анықтады. Олар тек жүрек пен қан тамырларын қорғап қана қоймай, сонымен қатар жасушаларды қартаюдан сақтап, физикалық жүктемеден кейін қалпына келуді жылдамдатады. Зерттеу нәтижелері Nutrients журналында жарияланды, деп хабарлайды turkystan.kz.
Антоциандар – көкжидек, қара қарақат, қызыл қырыққабат, күлгін картоп және басқа да күлгін өнімдерге түс беретін табиғи заттар. Ғалымдардың айтуынша, бұл пигменттер ағзаның антиоксиданттық қорғанысын белсендіреді, қабынуды азайтады және жүрек-қантамыр жүйесінің жұмысын жақсартады.
Зерттеу барысында антоциандардың Nrf2 және NF-κB деп аталатын жасушалық жолдарға әсер ететіні анықталды. Бұл механизмдер жасушаларды оттектік стресс пен тіндердің зақымдануынан қорғайды, яғни олар қартаюды баяулатады.
Зерттеуге қатысқан адамдар антоциандарға бай тағамдарды тұрақты түрде тұтынған кезде жаттығудан кейін тезірек қалпына келіп, жалпы шыдамдылық пен иммунитет деңгейінің артқанын көрсетті.
Алайда ғалымдар бұл пигменттердің ағзаға сіңуі өте төмен екенін айтады: шамамен 2 пайыз ғана. Сондықтан қазір зерттеушілер антоциандардың биожетімділігін арттыру жолдарын іздестіруде.
Болашағы зор әдістердің бірі – микрокапсула технологиясы, ол антоциандарды асқазан ортасында бұзылудан қорғайды. Тағы бір тәсіл – наноэмульсия, онда зат сұйықтық ішінде ұсақ тамшылар түрінде тарайды, бұл оның сіңуін жеңілдетеді.
Ғалымдар сондай-ақ С витамині антоциандардың ағзаға жақсы сіңуіне көмектесетінін анықтады.
Осылайша, күнделікті тамақ рационыңызға көкжидек, қара қарақат немесе күлгін көкөністер қосу – тек пайдалы емес, жасушалық деңгейде жастық пен күшті сақтаудың табиғи амалы.
