Қостанай облысының Федоров ауданында дамуында ерекшеліктері бар 14 жастағы қызды іздеуге бағытталған ауқымды жұмыстар аяқталды. Бала 25 қыркүйек таңертең Успеновка ауылы маңындағы орман алқабынан аман-есен табылды, деп хабарлайды turkystan.kz.
Полицияның айтуынша, 24 қыркүйек кешке алаңдаған анасы қызының жоғалғаны туралы арыз берген. Сөйлеу қабілетінде және ақыл-ой дамуында кемшілігі бар қыз үйінен пижамамен шығып кеткен, жеңіл киінгендіктен оның өмірі мен денсаулығына елеулі қауіп төнген.
Іздеуге жүздеген адам тартылды – полиция қызметкерлері, құтқарушылар, кинологтар, ерікті іздеу топтары, әскерилер, сондай-ақ ауыл мұғалімдері мен тұрғындары. Түнде шамамен 300 адам жұмылдырылса, таңға қарай олардың саны 500-ден асты. Дрондар, жылу бейнелеу құралдары және техника қолданылды.
«Таңғы сағат 8 шамасында Успеновка ауылынан екі шақырым жерде орман алқабында полицейлер тобы қызды байқап қалған. Алғашында ол қашпақ болды, бірақ кейін өз еркімен қызметкерлерге қарай шықты. Бірнеше минуттан соң анасына табысталды», – делінген Қостанай облысы ПД баспасөз қызметінің хабарламасында.
