Щучинск қаласында техникалық және кәсіптік білім беру ұйымдарының студенттері арасында Республикалық слет өз жұмысын бастады.
Еліміздің барлық өңірінен келген 100-ден астам белсенді жастар жұмысшы мамандықтарының болашағын талқылап, шеберліктерін шыңдап, жаңа серпін мен шабыт алуға жиналды. Іс-iараның ашылуына ҚР Премьер-министрінің орынбасары Ермек Көшербаев, оқу-ағарту министрі Ғани Бейсембаев, Ақмола облысының әкімі Марат Ахметжанов, ҚР Парламенті Мәжілісінің депутаттары және т. б. қатысты.
Премьер-министрдің орынбасары Ермек Көшербаев слет қатысушыларын құттықтап, жұмысшы мамандықтарының ел дамуындағы маңызды рөлін атап өтті:
«Мемлекет басшысы 2025 жылды Жұмысшы мамандықтары жылы деп жариялады. Мұнда мәселе тек бір саланың мамандарын даярлау туралы ғана емес, жалпы еңбекке деген көзқарасты қайта қарау туралы болып отыр. Ұзақ уақыт бойы жұмысшы кәсіптеріне қатысты қоғамда стереотиптер қалыптасып келді. Бүгінде жағдай өзгерді. Қазіргі жұмысшы — жаңа технологияларды меңгерген, еңбек нарығында сұранысқа ие білікті маман. Мемлекет ретінде біз еңбекті қадірлеу дәстүрін қайта жаңғыртып, жұмысшы еңбегіне лайықты құрмет қайтару үшін бар күшімізді салып жатырмыз. Өйткені индустриялық даму, өндірісті жаңғырту, экономикалық тұрақтылық – бәрі ең алдымен сіздердің еңбектеріңізге тікелей байланысты. Осы өзгерістердің өзегінде – сіздер, жас мамандар тұрсыздар», — деді Ермек Көшербаев.
Биыл жыл басынан бері 8 мыңнан астам кәсіби бағдар беруші маман дайындалды, мектептерде 352 бейіндік сынып ашылды, 1300-ден астам оқушы жұмысшы мамандықтарының негіздерін меңгеріп үлгерді. Шефтік қамқорлыққа алған кәсіпорындар саны 7 есеге артса, кәсіпорындармен дуалды оқыту келісімшарттарының саны 2 есеге көбейді. 185 колледжде материалдық-техникалық база жаңартылып, студенттердің жатақханамен қамтылуы 96%-ға жетті.
1 қыркүйектен бастап техникалық және кәсіптік білім беру ұйымдарына арналған жан басына шаққандағы қаржыландыру көлемі 2 есеге өсіп, бір студентке 437 мың теңгеден 912 мың теңгеге дейін ұлғаяды.
«Қазіргі еңбек нарығында тек диплом ғана емес, нақты дағды мен тәжірибе маңызды рөл атқарады. Қазақстанның техникалық және кәсіптік білім беру жүйесі жаңа деңгейге көтерілуде. Біз Қытай, Франция, Түркия, Жапония, Ұлыбритания, Грузия және өзге де елдермен бірлесіп, 10 халықаралық жобаны қолға алдық. Алғаш рет колледждерге халықаралық сертификаттау енгізілді. Енді біздің студенттер өз құзыреттерін әлемдік стандарттар бойынша дәлелдеп, шетелдік тағылымдамаларға, халықаралық еңбек нарығына жол ашатын болады», — деді Ғани Бейсембаев.
Слетқа қатысушылардың арасында Жамбыл политехникалық жоғары колледжінің 3-курс студенті Аяла Байболат та бар. Ол мемлекеттен білім гранты негізінде оқиды және оның колледжі интернационалдандыру жобасына алғашқылардың бірі болып енген.
«Президентіміз Жұмысшы мамандықтары жылын жариялаған сәтте біздің еңбегіміздің маңыздылығы мен қажеттілігі айқындалды. Бүгінгі таңда колледждер – саналы әрі болашағы зор таңдау. Бізде заманауи шеберханалар, халықаралық тағылымдамалар ашылып жатыр, ең бастысы – нақты мүмкіндіктер бар. Осындай сенім артқандарыңызға алғыс айтамын», — деді студент.
Слет 24 шілдеге дейін жалғасады. Үш күн бойы жастар мотивациялық кездесулерге, шеберлік сабақтарына, интерактивті білім беру блоктарына, командалық тапсырмалар мен мәдени-спорттық бағдарламаларға қатысады.
Айта кетейік, елімізде 772 колледж бар, онда 550 мыңнан астам студент білім алуда.
