Еліміздің таулы аудандарында сел қауіпті басталды. Ауа температурасының жоғарылауына және таулы аймақта нөсерлі жаңбырдың түсуіне байланысты мұздықтар қарқынды еріп, көлдерге құйылып жатыр.
Қазір 78 тұрақты және 39 маусымдық (жазғы) бақылау бекетінің, оның ішінде мұздақ көлдердің қалыпты жұмыс істеуі қамтамасыз етілуде. Бақылау бекеттері тәулік бойы жұмыс істейді, жағдайдың кез келген өзгерістеріне үздіксіз мониторинг жасалып, жедел ден қойылуда.
ТЖМ «Қазселденқорғау» ММ қызметкерлері сел қаупін болдырмау және халықтың қауіпсіздігін қамтамасыз ету мақсатында биік таулы аудандарда алдын алу іс-шараларын жүргізуде.
«Қазавиақұтқару» АҚ тікұшағын тарта отырып, авиациялық жұмыстар жүргізілді. Атап айтқанда, мұздақ көлдерде маусымдық гидробекеттер ашылды, бақылаушылар, барлау және жұмыс бригадалары, сондай-ақ қажетті жабдықтар жеткізілді.
Ықтимал қауіпті көлдерде су деңгейін қауіпсіз белгілерге дейін төмендету жұмыстары басталды. Сонымен қатар мамандар көлдердің су астындағы рельефін егжей-тегжейлі зерттеуге және олардың қазіргі жағдайын бағалауға мүмкіндік беретін батиметриялық түсірілімдер жүргізді.
«Қазселденқорғау» ММ сел және көш-
кін қаупі бар учаскелер мен селден қорғау газ турбиналы қондырғыларына үнемі тексеру жүргізеді. Сел жағдайын және мұздақ биік таулы көлдердің жай күйін фондық бағалауды анықтау үшін аэровизуалды зерттеу жүргізіледі. Қазір «Қазселденқорғау» ММ қызмет көрсететін аумақтарда тұрақты сел қаупі сақталуда.
Сел қаупі бар аймақтардағы халықты ықтимал қауіптер туралы ақпараттандыру мақсатында таулы жерлерде тұрғындар, туристер мен демалушылар арасында түсіндіру жұмыстары жүргізіледі.
Осыған байланысты ТЖМ таулы жерлерде демалу мен туристік жорықтарды ұйымдастыру кезінде барлық сақтық шараларын сақтауға шақырады. Ағымдағы және болжамды гидрометеорологиялық жағдайды нақтылау, сақтық шараларын сақтау және сел қаупі бар кезеңде және сел ағынынан өту кезінде таулардағы жүріс-тұрыс ережелерін білу маңызды.
А.БИМЕНДІ
