Абай атындағы Қазақ ұлттық педагогикалық университетінде Математика, физика және информатика факультетінің бітіруші түлектеріне арналған салтанатты диплом табыстау рәсімі өтті.
Іс-шараға университеттің Басқарма төрағасы–ректоры Болат Тілеп, Білім беру бағдарламаларын талдау департаментінің директоры Нұржамал Ошанова, факультет деканы Шерипидин Хамраев, кафедра меңгерушілері, профессорлық-оқытушылар құрамы, түлектер, олардың ата-аналары мен құрметті қонақтар қатысты.
Салтанатты іс-шара барысында Ғылым және жоғары білім министрі Саясат Нұрбектің түлектерге арналған бейнеқұттықтауы көрсетіліп, жас мамандарға ақжарма тілектер жолданды.
Рәсімде университет ректоры Болат Тілеп құттықтау сөз сөйлеп, бітіруші түлектерді осы маңызды күнмен құттықтап, олардың көпжылдық табанды еңбектері мен оқу барысында жеткен жетістіктеріне жоғары баға берді. Сондай-ақ, алдағы өмір жолында сәттілік тілеп, жас мамандардың университет беделін арттырып, ел игілігіне адал қызмет ететініне сенім білдірді.
«Сіз осы қарашаңырақта бойыңызға тек білім ғана емес, өмірлік бағыт-бағдар, адами құндылықтар мен асқақ рухты сіңірдіңіз. Әрине, бұл Сіз үшін алдағы өмір жолыңызда сенімді серігіңіз, биік мақсаттарға жетелейтін алтын арқау болады деп сенемін. Кәсіби жолыңыз табыс пен сәттілікке толы болғай!», – деді ректор өз сөзінде.
Сонымен қатар, диплом табыстау рәсімінде түлектерге университет атынан ұлы ақын Абай Құнанбаевтың «Қара сөздер» жинағы естелік ретінде тарту етілді. Сондай-ақ, салтанатты шарада эстрада әншісі Жігер Ауыпбаев арнайы қонақ ретінде қатысып, өзінің өнерімен кеш қонақтарына мерекелік көңіл күй сыйлады.
Айта кетейік, биыл Математика, физика және информатика факультетін 850 түлек сәтті тәмамдап, жоғары білім туралы дипломға ие болды. Оның ішінде 692 бакалавр және 156 магистрант бар. Ал 98 түлек оқу орнын үздік аяқтап, «қызыл диплом» иегері атанды.
