Шымкент қалалық перзентханасында 24 жастағы Феруза Рахимова үшем – екі ұл және бір қыз босанды, деп хабарлайды turkystan.kz.
Бұл – оның алғашқы босануы. Сәбилер жүктіліктің 31-аптасында дүниеге келіп, медициналық көмекті қажет етті. Қазір олардың жағдайы тұрақты деп бағалануда.
Шымкент қаласының денсаулық сақтау басқармасының баспасөз қызметінің мәліметінше, нәрестелер туылған кезде ауыр жағдайда болған, олар жансақтау бөлімінде ем қабылдап, бақылауда болған. Оларға дер кезінде тыныс алу аппараттарының көмегімен қажетті көмек көрсетілген. Қазір сәбилердің жағдайы жақсарды, олар ана сүтімен қоректене бастады және аналарының жағдайымен бірге жақсы деп бағалануда.
«Медициналық персоналдың кәсібилігінің арқасында балалар қажетті ем алып, салмақ қосып, ана сүтімен емуді бастады. Қазір ана мен сәбилердің жағдайы тұрақты және қанағаттанарлық», – деп хабарлады қалалық денсаулық сақтау басқармасы.
Жаңа туған сәбилерге Мұстафа, Мұса және Хадия есімдері берілді. 2025 жылдың басынан бері Шымкентте 12 648 сәби дүниеге келген, олардың ішінде 149 егіз және 3 үшем тіркелген.
