Әлемдік мұнай бағасы күрт өсті, Brent маркалы мұнай баррелінің бағасы 76 доллардан асты, деп хабарлайды turkystan.kz.
Астана уақытымен сағат 09:00-де Лондонның ICE биржасында Brent маркалы мұнайдың тамыз айындағы фьючерстерінің бағасы 4,73 пайызға өсіп, барреліне 76,7 долларды құрады.
WTI маркалы мұнайдың тамыз айындағы фьючерстерінің бағасы 4,66 пайызға өсіп, барреліне 73,53 долларды құрады.
Мұнай бағасының өсуі геосаяси тәуекелдердің аясында орын алды: Израиль мен Иран арасындағы қақтығыс, сондай-ақ Ормуз бұғазының жабылу қаупі. Бұл бұғаздың ашық күйінде қалуы және АҚШ-тың жағдайдың одан әрі ушығуын болдырмауы ұзақ мерзімді ықпалды анықтайды. Халықаралық энергетикалық агенттік (IEA) мұнай қорының жоғары деңгейде екенін хабарлағанымен, әлемдегі белгісіздік мұнай бағасының көтерілуіне себеп болды.
Бұл Қазақстан үшін нені білдіреді?
Қазақстан үшін, мұнай экспорттаушы ел ретінде, әлемдік бағалардың өсуі – оң сигнал. Қара алтын құнының артуы бюджет кірісін арттырып, сауда балансына оң әсер етіп, ұлттық валютаның нығаюына ықпал етеді. Сонымен қатар, мұнай бағасының өсуі экономикаға жалпы қолдау көрсетіп, Ұлттық қорға түсетін түсімдерді ұлғайтып, инфрақұрылымдық жобаларды іске асыру мүмкіндіктерін кеңейтеді.
2025 жылға арналған Қазақстан бюджетіндегі мұнай бағасы барреліне 75 доллар деңгейінде белгіленген. Бұл баға деңгейінен төмендеген жағдайда мемлекет бюджет тапшылығына тап болып, жетіспейтін кірістерді өтеу үшін Ұлттық қор қаражатын пайдалануға мәжбүр болады.
