Л.Гумилев атындағы Еуразия ұлттық университетінің Ғылыми кітапханасында Ұлы Жеңістің 80 жылдығына арналған ерекше рухани іс-шара – «Хат жаздым қалам алып қан майданнан» атты кітаптың тұсаукесері өтті.
Аталған жинақта қазақ жауынгерлерінің Екінші дүниежүзілік соғыс кезінде бораған оқтың ортасынан, қан майданнан жазған, жүрек тебірентер, осы күнге дейін еш жерде жарияланбаған хаттары топтастырылған. Университеттің бастамасымен, архивтік ізденістер нәтижесінде табылған бұл хаттар ел тарихының елеусіз қалған беттерін қайта тірілтті. Жинақта Бауыржан Момышұлы, Мәлік Ғабдуллин, Әзілхан Нұршайықов, Әлия Молдағұлова сынды белгілі тұлғалармен қатар, есімдері беймәлім 130-ға жуық қазақ жауынгерінің лирикалық, сәлем, өлең және әнмен өрілген хаттары енгізілген. Осынау майдан хаттары сексен жылдан соң жеке жинақ болып, жарияға шығып отыр.
Бейбіт күннің қадірін жете түсіну үшін соғыстың шынайы бет-бейнесін боямасыз қабылдап, майдангердің көзімен көре білу керек. Осынау сұрапыл жылдардан елес беретін еңбектің бұл – бірінші томы. Алдағы уақытта екінші томда қан майданнан жолданған басқа да майдангерлердің хаттары оқырман назарына ұсынылмақ.
– Алғашында университеттің қаржылық мүмкіндігіне орай аз ғана тиражбен шығарамыз. Бірақ біз мұны баспаларға ұсынамыз. Баспалар қызығушылық танытып, әрі қарай тиражын көбейтіп, бұл кітапты таратуға әзір екенін білдіріп отыр. Сонымен бірге кітаптың электронды нұсқалары бар. Еліміздегі барлық кітапханаларға, жоғары оқу орындарына электронды нұсқасын тегін ұсынып таратамыз, – дейді кітаптың жалпы редакциясын басқарған Л.Гумилев атындағы Еуразия ұлттық университетінің ректоры Ерлан Сыдықов.
Тағылымы мол таныстырылымның тізгінін осы университеттің Журналистика және әлеуметтік ғылымдар факультетінің деканы, жазушы Нұржан Қуантайұлы ұстап, іс-шараны Мемлекет және қоғам қайраткері, профессор Қуаныш Сұлтанов ашып, майдан хаттарының тарихи маңыздылығына тоқталды. Мемлекеттік сыйлықтың иегері, жазушы Сауытбек Әбдірахманов, Мемлекеттік сыйлықтың иегері, ақын Ғалым Жайлыбай, Парламент депутаттары Қазыбек Иса, Жанарбек Әшімжан, белгілі ғалымдар, қоғам қайраткерлері Дархан Мыңбай, Кәрімбек Құрманалиев жинақтың құндылығын атап өтіп, университет басшылығына алғыс білдірді.
Гүлжазира ЕРТАСОВА,
Л.Гумилев атындағы
ЕҰУ-дің аға оқытушысы
