2024 жылы әлем бойынша 36 миллионнан астам жүк сөмкесі жоғалған, бүлінген немесе иесінен "адасып кеткен". Кейбірі иесіне қайтарылғанымен, мыңдаған сөмке мәңгіге жоғалып кетеді. Алайда солардың ішінен табылған заттар шындығында талай адамды таңғалдырады.
Unclaimed Baggage атты АҚШ-тағы ритейл дүкені жыл сайын әуекомпаниялардан иесіз қалған шабадандарды сатып алып, ішіндегі заттарды сатады. Компания биылғы Found Report есебінде ең таңғаларлық, ең қымбат және ең жиі кездесетін жоғалған заттарды жария етті.
Unclaimed Baggage президенті Брайан Оуэнстің айтуынша, “Біз жай ғана заттарды емес, сол заттардың артындағы саяхатшылардың ерекше хикаяларын ашамыз”.
Ортағасырлық сауыттар мен өлі жәндіктер
Кей сөмкелерден тапқан дүниелер ақылға қонымсыз. Мысалы, бірінен – ортағасырлық сауыт, енді бірінен – Рим сарбазының дулығасы шыққан. Ал бір шабаданнан – мұздатылған тауық аяғы, екіншісінен сауыттағы ысылдаған жыландар табылған.
Бұдан бөлек, көптеген алып өрмекшілер мен қоңыздар да сақталған күйінде табылған. Ал кей сөмкелердің ішінен ер адамның мұрт бигудилері, ескі фокусшы қалпағы және тіпті экзорцизмге арналған ескі француз кітабы табылған.
Жай ғана қызық емес, ақылға қонымсыз
Қызметкерлердің бірін қатты ашуландырған сөмкеде қазына не тарихи артефакттар емес, жай ғана тастар болған. Олардың пікірінше, бұл геологтың коллекциясы болуы мүмкін, бірақ не болса да, оның мағынасы жұмбақ күйде қалды.
Бір сөмкеде жүкті әйелдің ішіне ұқсас жалған силикон құрсақ, бағалы тастар салынған тіс протезі болған.
Ретро сән мен байлық: жоғалған люкс заттар
Жоғалған сөмкелерден табылған заттардың кейбірі тек оғаш емес, сонымен бірге өте қымбат. Ең қымбат табылған зат — 18 караттық ақ алтыннан жасалған жалғыз гауһар сақина, шамамен $39 000 тұрады. Сонымен қатар Rolex маркалы алтын сағаттар мен Chanel, Alexander McQueen сән үйлерінің киімдері, Louis Vuitton шабадандары да табылған.
Бұдан бөлек, $7 000 тұратын қолдан жасалған флейта, дизайнерлік ит сөмкелер мен қымбат фотоаппараттар да ұмыт қалған.
Uber көліктері мен қонақүйлердегі “олжалар”
Жолаушылар тек әуежайда емес, басқа жерлерде де заттарын ұмытып кетеді. Uber жүргізушілері өткен жылы 1,7 миллион смартфон, 70-тен астам Nintendo Switch және тіпті 10 тірі омар тапқан. Тағы табылған заттар қатарында бензопила, ДНҚ тестілеу жинағы болған.
Қонақүйлерде ұмытылған заттар тізімі де әсерлі: бір дөңгелек, тіс, екі гипспен оралған аяқ, ақша толы бума, үй кесірткесі мен тірі балапан.
Лондон метросы да шет қалмады
TFL — Лондондағы қоғамдық көлік желісі — аптасына 6 000-ға жуық жоғалған затты тіркейді. Ең ерекше табылғандар арасында: қайнатылған бақалар салынған қорап, жарқанаттарға толы банка, “Доктор Кто” сериалындағы далек костюмі және инебалық бар.
