Ауылдарда шешімін таппай отырған мәселе көп. Жұмыссыздық, инфрақұрылымның жеткіліксіздігі, жастардың қалаға жаппай көшуі нәтижесінде, халық санының азаюы, ауылдардың жабылуы үлкен проблемаға айналып отыр. Ауылдағы білім беру, медицина салаларындағы жағдай да көп жағдайда қала деңгейіне жете бермейді. Әсіресе, ауыл шаруашылығымен айналысатын тұрғындар үшін нарыққа шығу, өнімдерін тиімді өткізу мәселесі өзекті болып отыр.
Ұлттық экономика вице-министрі Бауыржан Омарбековтың айтуынша, ауылдық жерлерде шағын индустриалды аймақтар құру көзделіп отыр. Бұл бастама ауыл тұрғындарының экономикалық белсенділігін арттырып, жаңа жұмыс орындарын ашуға мүмкіндік бермек.
Қазір елімізде 6 179 елді мекен бар, онда 7,5 миллионнан астам халық тұрады. 2023 жылы ауылдық аймақтарға негізгі капиталға 7,9 трлн теңге инвестиция құйылып, ауыл шаруашылығындағы еңбек өнімділігі соңғы бес жылда екі есе өсіп, бір жұмысшыға шаққанда 4,2 млн теңгеге жетті. Бұл ауылдағы бизнес пен өндіріс саласының жандана түскенін көрсетеді.
Ауылдарды дамыту үшін 2019 жылдан бері Өңірлік стандарттар жүйесі іске асырылып келеді. Бұл жүйе елді мекендердің әлеуметтік және экономикалық инфрақұрылымын жақсартуға бағытталған. Омарбековтың айтуынша, 2024 жылы бұл көрсеткіш орта есеппен 65,8 пайызға жетті. Қамтамасыз ету деңгейі жоғары ауылдар саны 1 435-ке жетіп, 2023 жылмен салыстырғанда 119 ауылға артты. Сонымен қатар ауылдарды ауызсумен қамту деңгейі 97,8 пайызға, электрмен жабдықтау көрсеткіші 99,8 пайызға жеткен.
Министрлік 2023-2027 жылдарға арналған Ауылдық аумақтарды дамыту тұжырымдамасын жүзеге асыруда. Бұл құжат ауылдағы инфрақұрылымды жақсартып, экономикалық әлеуетті көтеруге бағытталған. Оған «Жайлы мектеп», «Ауылдық денсаулық сақтауды жаңғырту», «Ауыл – Ел бесігі», «Ауыл аманаты», «Дипломмен ауылға» бағдарламалары кіреді. Сондай-ақ «Бір ауыл – бір өнім» жобасы іске қосылып, ауылдық кәсіпкерлерге өз өнімдерін нарыққа шығаруға мүмкіндік беріп отыр.
Ауыл шаруашылығы мен шағын индустриалды аймақтарды дамыту – елдің азық-түлік қауіпсіздігін қамтамасыз етіп, ауыл тұрғындарының өмір сүру сапасын арттырудың негізгі тетігі. Мемлекет қолдауының арқасында алдағы жылдары аймақтарда жаңа кәсіпорындар ашылып, өңірлік экономика жаңа деңгейге көтерілсе, ауылдың да көсегесі көгеретіні анық.
