Еліміздің інжу-маржанына айналған Алакөл шетелдік туристердің қызығушылығына ие екенін және жыл сайын онда демалатын отандастарымыздың санының артып отырғанын ескерсек, Алакөлдің инфрақұрылымы мен қызмет көрсету сапасын жақсарту стратегиялық маңызды қадамның бірі болуға тиіс.
Елімізде жыл сайын екі миллионға жуық турист Алакөлді таңдайды. Аймақтың ең танымал туристік бағыттардың біріне айналуына судың емдік қасиеті тікелей әсер етеді. Өйткені көл суы минералды ресурстарға, йод, тұзбен қатар, Менделеев кестесіндегі химиялық элементтерге бай. Көлдің адам ағзасына пайдалы екенін медицина мамандары да дәлелдеген. Судың құрамындағы минералдар тыныс алу мүшелеріне, сүйек-бұлшық ет және жүйке жүйесі аурулары мен тері ауруларына мың шипа. Мамандар судың құрамы Қара теңіз бен Өлі теңізге ұқсайды дейді.
Бүгінде Көктұма мен Ақши аймағында 300-ден астам демалыс орны туристерге маусым сайын өз қызметтерін ұсынып келеді. Алакөлге жыл сайын барып демалатындардың бірі – Айнұр Үсіпжанова.
– Біз жыл сайын отбасымызбен Алакөлге барамыз. Бұрын балалар кішкентай кезде пойызбен барсақ, қазір көлігімізбен жол тартамыз. Осы дәстүрді әдетке айналдырғанымызға 7-8 жылдың шамасы болды әрі жыл сайын тек бір ғана пансионатқа орналасамыз. Соңғы жылдары көлге келушілер саны тіптен артқан. Мәселен, Ресей, Қытайдан келген туристерді жиі көресіз. Маған ең ұнайтыны – көлге таңертең ерте бару. Мүлгіген тыныштық, саф ауа, жағаға ұрған толқынмен жарысқан шағаланың көл бетінде қалықтауы ерекше көрініс. Бір сәт қым-қуыт тіршілікті ұмытып, демалыстың нағыз рахатын сезініп қайтасыз. Түнімен тыныққан суға шомылсаңыз, күні бойы сергек жүресіз. Алакөл суы адамды тез сергітіп, ширатып жібереді. Ал суының түсі уақытқа байланысты ауысып отырады. Көл таңертең күн шуағымен нәзік көгілдір түске боялса, кешке қарай көк түске айналады. Ал егер жел тұрып, дауыл соқса, Алакөлдің суы ластанып, қара түске боялып шыға келеді. Одан бөлек, Алакөл – малтатас және қиыршық таспен тегістелген қара жағажайы бар әлемдегі жалғыз көл екен. Сондықтан шипалы суынан бөлек, осындай әдемі көрінісі үшін де жыл сайын баруға тұрарлық, – дейді Айнұр.
Радикулит, артрит, тері ауруларына шипа іздеп келген талай жұрттың теңіз суының арқасында жазылғанын естіп те, көріп те жүрміз.
– Құрамында радон, сілті және басқа да пайдалы элементтері бар судың емдік қасиеттері тері ауруларын, тірек-қимыл аппаратымен байланысты ауруларды емдеуге ықпал етеді, жүйке жүйесін және ағзаның жалпы жағдайын жақсартады, – дейді Алматы облыстық Туризм басқармасының басшысы Жанар Алшымбаева.
Алайда Алакөлде демалушылардың айтары да бар. Біріншісі – жол қиындығы, билет табылмауы, екіншіден жағалаудағы қауіпсіздік мәселесі.
– Отандық туризмді қолдап жыл сайын Алакөлге барғанымызбен, кей мәселелерді көргенде көңіліміз түсіп қалатыны жасырын емес. Тәртіп сақшылары, туристік полиция, құтқарушылары, медицина қызметкерлері сынды мамандар тапшы екені байқалады. Ақшидегі шағын амбулаториялық пункт мыңдаған туристің сұранысын қанағаттандыра алмасы анық. Алайда мұндай өзекті мәселелер шешімін табады деп үміттенеміз, – дейді Айнұр Үсіпжанова.
Еліміздің інжу-маржанына айналған Алакөл шетелдік туристердің қызығушылығына ие екенін және жыл сайын онда демалатын отандастарымыздың санының артып отырғанын ескерсек, Алакөлдің инфрақұрылымы мен қызмет көрсету сапасын жақсарту стратегиялық маңызды қадамның бірі болуға тиіс.
А.БИМЕНДИЕВА
