Мемлекет басшысының «Таза Қазақстан» жалпыұлттық бастамасы аясында «AMANAT» партиясының тұрақты түрде өткізілетін «Таза бейсенбі» акциясы аймақтарда жалғасын табуда.
Абай облысының Бесқарағай ауданында өткен «Таза бейсенбі» акциясына 20-дан астам партия мүшесі қатысып, Долон ауылдық округіндегі Жеңіс саябағын қоқыстан тазартты. Бұл іс-шара Жеңістің 80 жылдығына орай ұйымдастырылып, тарихи орындарды таза ұстауға және қоршаған ортаны қорғауға арналды.
Ал Ақмола облысының Степногорск қаласында өткен экологиялық акция аясында «AMANAT» партиясының бастауыш ұйымы мүшелері орталық саябақты, қаланың шеткері көшелері мен көпқабатты тұрғын үйлердің аулаларын тазартты. Бұл бастамаға «Жастар рухы» жастар қанаты мен еріктілер де қосылды.
Қызылорда облысының Жалағаш кентінде «AMANAT» партиясының мүшелері «Қисық арық» каналына ауқымды тазалық жұмыстарын жүргізді. Игі іске аудандық мәслихаттағы депутаттық фракция мүшелері, бастауыш партия ұйымдарының өкілдері мен еріктілер жұмылдырылып, жалпы саны 70-тен астам азамат атсалысты.
«Бұл арна кенттегі ағаштарға су жеткізуші маңызды арналардың бірі. Көктем келіп, табиғат жаңарған шақта суармалы жүйелердің үздіксіз жұмыс істеуі ерекше маңызға ие. Біздің мақсатымыз – тек қана арнаны тазарту емес, қоршаған ортаға қамқорлық таныту. Бұл бастамамызды экологиялық мәдениетті қалыптастыру жолындағы маңызды қадам деп санаймыз», - деді партияның Жалағаш аудандық филиалының атқарушы хатшысы Қаншагүл Мұстафаева.
Ақтөбе облысында партия мүшелері Хромтау қаласындағы «Отан Ана» ескерткішінің айналасын тазартты. Тарихи маңызы зор бұл мемориал аумағы бірнеше жылдан бері жөндеу жұмыстарын қажет етіп келген.
«Бұл ескерткіш – соғыс жылдары ел бостандығы үшін мерт болған жауынгерлер мен арамызда үлгі-өнеге болып жүрген соғыс ардагерлеріне деген ерекше құрмет белгісі. Мемориалдың тазалығын қадағалау, оның маңайын күтіп ұстау – біздің ортақ міндетіміз. Бүгін жиналған барлық қатысушыларды осындай игі іске атсалысқаны үшін алғысымды білдіремін», – деді Партияның Хромтау аудандық филиалының атқарушы хатшысы Майра Балқыбаева.
БҚО-ның Тасқала ауданында партия мүшелері Жеңіс скверінде тазалық жұмыстарын жүргізіп, аумақты ақтап сырлады. Сонымен қатар Ұлы Отан соғысының тыл ардагерлерінің үйлерінде де тазалық жұмыстарына көмектесті.
Шымкент қаласында өткен ауқымды экологиялық акцияға 300-ден астам адам қатысты. Олардың қатарында мәслихат депутаттары, партия мүшелері, коммуналдық мекеме қызметкерлері, студенттер мен еріктілер болды.
Акция барысында 300 ағаш көшеті отырғызылып, 250 метр ирригациялық арық пен 1000 метр жаяу жүргіншілер жолы қоқыстан тазартылды.
Жамбыл облысында ұйымдастырылған эко-акцияға 100-ден астам адам қатысып, Қызыл Жұлдыз және Қостөбе ауылдарының арасындағы күре жол бойын күл-қоқыстан тазартты.
«Бұл бастамамыз баршаға үлгі болып жатыр. Тазалық сақтау – әр адамның жауапкершілігі. Бүгінгі іс-шарада көптеген ауыл тұрғындары мен жастар белсенділік танытты. Біз жол жиегін ғана емес, ауылымыздың айналасын да ретке келтірдік. Осындай экологиялық шараларды жүйелі түрде өткізуіміз қажет», – деді Жамбыл облыстық филиалы атқарушы хатшысының орынбасары Уәлихан Болатбек.
Қостанай қаласында Тобыл өзенінің жағалауы қоқыстан тазартылып, акцияға 40-қа жуық адам қатысты.
Сонымен қатар Ақтау қаласында «Жастар Рухы» жастар қанатының мүшелері мен еріктілері колледж аумағын тазалап, 25 тал мен 80 раушан гүлін отырғызды.
«Бұл тек бір күндік науқан емес, керісінше, нәтижесі ұзақ мерзімді қамтитын маңызды жоба. Біз бүгін тек қоқыс жинап қана қоймай, қаламыздың көгалдануына үлес қостық. Болашақта осы көшеттер жайқалып, қаламызды көркейтіп тұрса, еңбегіміздің еш кетпегені», – деді «Жастар рухы» жастар қанаты облыстық филиалының төрағасы Абзал Марат.
Еске сала кетейік, өткен жылдың 6 маусымынан бастап «AMANAT» партиясының мыңдаған белсенділері мен мүшелері әр бейсенбі сайын «Таза бейсенбі» акциясына қатысып, қалалар мен ауылдарды, саябақтар мен скверлерді, ескерткіштер мен су айдындарын қоқыстан тазартып келеді. Бүгінгі таңда республика бойынша 120 мың тонна қоқыс жиналып, акцияға 70 мың адам қатысты. Сонымен қатар белсенділер 100-ден астам өзен, көл мен су қоймаларын тазалады. Жұмысты тиімді жүргізу үшін ластанған аумақтардың карталары әзірленіп, әрбір учаске мәслихат депутаттары, белсенділер және партияның бастауыш ұйымдарының жетекшілері бекітілді. Олар өздеріне бекітілген аумақтардағы тәртіп пен тазалықты қамтамасыз етіп қана қоймай, абаттандыру және инфрақұрылымды дамыту мәселелерін шешуде.
