Батыс Қазақстан облысының Бәйтерек ауданына қарасты Мичурино ауылында ер адам досын ақша үшін өлтірді, деп хабарлады облыстық соттың баспасөз қызметі.
Қайғылы оқиға 2024 жылдың жазында болған.
“Сот материалдарына сәйкес, сотталушы Х. жәбірленуші Ж.-ға қарыз болған, бірақ оны қайтаруға ниетті болмаған. Бір сәтте олардың арасында жанжал шығып, Х. пышақ алып, досының кеудесіне бірнеше рет сұғып алған. Жәбірленуші сол жерде жан тапсырған”, – делінген хабарламада.
Бұл іс алқабилер сотында қаралды. Айыпталушы кінәсін мойындамағанымен, алқабилер оның айтқандарына сенген жоқ. Прокурор сотқа бұл қылмысты дәлелдейтін айғақтарды ұсынды, ал соттың шешімі біржақты болды.
“Азамат Х. ауырлататын мән-жайлармен кісі өлтіргені үшін кінәлі деп танылды. Сот оны орташа қауіпсіздік деңгейіндегі қылмыстық-атқару жүйесі мекемесінде 17 жылға бас бостандығынан айырды”, – деп хабарлады облыстық соттың баспасөз қызметі.
Үкім әлі заңды күшіне енген жоқ. Сотталушының апелляциялық шағым түсіруге құқығы бар.
