бейсенбі, 3 сәуір, 2025

Имам: Пайғамбарымыз да үй тазалығы жұмыстарын істеген

/
Скриншот
Имам ер адамдарға эгоны сабырға бағындыру қажеттілігі туралы кеңес берді.

Астана қаласының бас имамы Ерболат Жүсіпов журналист Айкерім Есенәліге берген сұхбатында «Ер мен әйел тең бе?» деген секілді көп пікірталастарға негіз болған сұраққа жауап берді. 

Ерболат Жүсіпов «ер де, әйел де еңбек адамдары болса және бірдей жұмыс істесе, үйдегі тіршілікті бөліп алуы керек пе?» деген жүргізуші сауалына «Пайғамбарымыз үйінде ешкі сауған, үй тазалығы тірліктеріне араласқан» деді.

Сондай-ақ имам ер адам өз әйелінен бір саты жоғары тұруы керек деген қоғамдық пікірді өз алдына дұрыс екенін, дегенмен ер кісі өз жарына «қызым, қарындасым» деп қараса, түсіністік оңай орнайтынын айтты. 

«Мен ер адамдарға «Сен қашан әйеліңе гүл алып бердің? Қыз кезінде өзіңе қарату үшін барлығын жасадың ғой, қашан соңғы рет мейрамханаға апардың?» деп жиі сұрақ қоямын. Біз ер адамдар былай ойлайды екенбіз: қазір 15 мың теңгеге гүл алып барамын, ол 3 күннен кейін солып қалады, одан да 15 мың теңгеге үйге  азық-түлік алайын.  Ер адамдар мәселе гүлдің 3-4 күн тұруында емес, мәселе эмоцияда екенін түсінбейді. Сіз есіктен кіріп гүл ұстатқан кездегі эмоцияны азық-түлікпен сатып ала алмайсыз»,— дейді Ерболат имам. 

Дін қызметкері ер адамдарға эгоны сабырға бағындыру қажеттілігі туралы кеңес берді. 

Бөлісу: