Бүгін қазақ әдебиетінің көрнекті өкілі, ақын, жазушы және мемлекет қайраткері Сәкен Сейфуллиннің туған күні, деп хабарлайды turkystan.kz.
Сәкен Сейфуллин 1894 жылғы 15 қазанда қазіргі Қарағанды облысының аумағында дүниеге келген. Ол қазақ әдебиетінің дамуына зор үлес қосып, поэзия, проза және драматургия салаларында құнды мұра қалдырды.
Ақынның «Тар жол, тайғақ кешу» романы, «Көкшетау» поэмасы мен көптеген өлеңі қазақ әдебиетінің алтын қорына енді. Оның шығармаларында ел тағдыры, азаттық, туған жерге деген сүйіспеншілік және халықтың өмірі кеңінен көрініс тапты.
Сәкен Сейфуллин қазақ әдебиетінің қалыптасуына үлес қосумен қатар, қоғамдық-саяси өмірге де белсене араласты. Алайда 1937 жылы саяси қуғын-сүргінге ұшырап, 1938 жылы атылды. Кейін ақталып, есімі мен шығармашылық мұрасы халқына қайта оралды.
Бүгінде Сәкен Сейфуллиннің есімі ел жадында сақталып, шығармалары оқырманға рухани мұра ретінде қызмет етіп келеді.
