Петропавл қаласындағы Киров атындағы кәсіпорында нағыз кәсіби мамандар еңбек етеді. Олар өз шеберлігі мен адалдығымен отандық өндірісті алға жылжытып келеді. Осындай мамандардың бірі – 5-ші санаттағы темір ұстасы Санат Мақанов.

Санат Мақанов Киров атындағы зауытта 2009 жылдан бері еңбек етіп келеді. Осы уақыт аралығында ол өзін тек жақсы қырынан көрсетіп, 2013 жылы «Үздік темір ұстасы» конкурсының жеңімпазы атанды. Зауыт басшылығы Санаттың еңбегін жоғары бағалайды. Әрдайым қолдау білдіреді. Алғашқы кезде ол зауыттың жатақханасында тұрған. Кейіннен кәсіподақтар арқылы тиімді ипотекалық бағдарлама бойынша пәтер сатып алды.

Кәсіби жетістіктері үшін ол облыс және қала әкімдіктерінен, Қазақстан Республикасының Индустрия және құрылыс министрлігінен бірнеше рет грамота алып, еңбегі еленген болатын. Ал 2020 жылы Астана қаласында ол жоғары награда – «Еңбек Даңқы» орденімен марапатталды. Санат спортқа да жақын. 2017 жылы ол «Ринг патшасы» турнирінің жеңімпазы атанды.

Санат жастарды жұмысшы мамандықтарынан қорықпай, зауытқа келіп, өнеркәсіпте өз мансабын бастауға шақырады. Өйткені бұл тек тұрақтылық пен лайықты жалақы ғана емес, сонымен қатар ертеңгі күнге деген сенім!

«Жұмысшы мамандығы – ел экономикасының негізі. Жастар түсінуі керек: зауыттағы еңбек тек отбасыны қамтамасыз етіп қана қоймай, Қазақстанның болашағына да үлес қосады. Мен жастарды жұмысшы мамандықтарынан қорықпауға, зауытқа келіп, өнеркәсіп саласында өз мансабын құруға шақырамын. Өз отбасың мен ел игілігі үшін әрдайым еңбек ету керек», – деді Санат Мақанов.

Айта кетсек, өнеркәсіптік өндірістерге жұмысқа орналасуға «AMANAT» партиясының «Жастар Рухы» жастар қанаты көмек көрсетеді. Мысалы, 2024 жылы «Жастарға жұмыс» жобасына қатысу нәтижесінде 46 жас адам Солтүстік Қазақстан облысының кәсіпорындарында жұмысқа орналасты. Өткен жылы жұмыс берушілер мемлекеттік бағдарламалардың жұмыс механизмдерін түсіндірген бос жұмыс орындары жәрмеңкесіне 300-ден астам солтүстікқазақстандық жас қатысты.