Батыс Қазақстан облысының Полиция департаменті бұрынғы қызметкерінің жарақат алуына байланысты қылмыстық іс қозғалып, қызметтік тергеу жүргізіліп жатқанын мәлімдеді, деп хабарлайды turkystan.kz.
Бұған дейін басылым Оралда мас күйінде болған жанжал кезінде полицияның жедел уәкіліне өзінен жасы үлкен әріптесі пышақ жарақатын салған болуы мүмкін екенін хабарлаған.
БҚО Полиция департаменті оқиғаға қатысты түсініктеме берді.
«8 қарашада бұрынғы полиция қызметкері медициналық мекемеге ішіне пышақ кірген жарақатпен жеткізілді. Қылмыстық іс қозғалды. Тергеу барысында барлық нұсқа, соның ішінде полицияның тағы бір бұрынғы қызметкерінің ықтимал қатысы тексеріліп жатыр», – делінген ведомствоның хабарламасында.
Ведомствоның мәліметінше, жәбірленушінің өзі жарақатты абайсызда алғанын айтқан.
«Оқиғаның мән-жайы әзірге анықталып жатыр. Тергеуге өзіндік қауіпсіздік бөлімшесінің қызметкерлері тартылды», – деп хабарлады баспасөз қызметі.
Департаментте қызметтік тергеу де жүргізіліп жатқаны айтылды. Сондай-ақ оқиғаға қатысы бар екі адамның да бұған дейін ішкі істер органдарынан жұмыстан шығарылғаны нақтыланды.
«Оқиғаға түпкілікті құқықтық баға тергеу нәтижесі бойынша беріледі», – деп хабарлады департамент.
Сонымен қатар полиция бірлесіп ішімдік ішу кезінде жанжал шыққаны туралы ақпараттың шындыққа жанаспайтынын мәлімдеді. Ведомство көрінеу жалған ақпарат таратқаны үшін қылмыстық жауапкершілік бар екенін еске салды.
