329
Лос-Анджелесте орман өртінен 10 мыңнан астам үй күлге айналды
Калифорния штатында 7 ірі от ошағы тіркелді
Fox News мәліметінше, Лос-Анджелесте орман өртінен 10 мыңнан астам үй өртеніп, күлге айналған.
Өрт 12 мың гектардан астам аумақты шарпыды. Тілсіз жау салдарынан 10 адам қаза тапты. Калифорния штатында өрт 7 қаңтарда басталып, 7 ірі от ошағы тіркелді.
Әлемге әйгілі Голливуд жотасындағы өрттің беті қайтарылғанымен, америкалық киножұлдыздардың элиталық үйлері де жалынға оранған.
Сарапшылардың бағалауынша, шығын көлемі 50 миллиард доллардан асады. Билік 180 мың адамды қауіпсіз аймақтарға эвакуациялауға мәжбүр болды.
Алайда төтенше жағдайды пайдаланып, қылмыс жасаушылар да табылды. Полиция иесіз үйлерді тонамақ болған 20 адамды қолға түсірді. Кейбір аудандарда коменданттық сағат енгізілді.
