Астанада «Әже, келін, немере. Ата, бала, немере» атты отбасылық байқау өтті. Байқауды Астана қаласы әкімдігінің қолдауымен қалалық Ардагерлер кеңесі «Ұрпақтар сабақтастығы» жобасы аясында ұйымдастырды.
Отбасылық қарым-қатынасты нығайту, салт-дәстүр мен ұлттық құндылықтарды насихаттау, ағайын арасындағы береке-бірлікті арттыру мақсатында өткен байқауға Алматы, Байқоңыр, Нұра, Есіл, Сарыарқа аудандарынан 5 отбасы жарысқа түсті. Әр отбасы өз ауданының үздік әулеттері.
Үш жыл бойы жұмыс істеп келе жатқан «Ұрпақтар сабақтастығы» жобасы отбасы институтын дамытуды көздейді. Байқауға қатысқан барлық отбасылар ұлағатты ата, ардақты әже, үлгілі әке, ибалы келін, үкілі қыз, мейірімді бала тақырыбын ашып, өз отбасындағы жетістіктер туралы таныстырды. Өнерлі отбасылар «Таныстыру», «Бата беру», «Презентациялық бейнеролик», «Әже шеберлігі», «Көрініс», «Сұрақ-жауап», «Өнер» бөлімдері бойынша сынға түсіп, шаңырақтағы шаттық пен берекені көрсете білді. Мәселен, байқау шарты бойынша атасы бата берсе, немересі өнер көрсетіп, әжесі мен келіні қолөнер бұйымдарын ұсыну қажет.
Есіл ауданынан қатысқан ұшқыштар династиясы – Хамзиндер отбасы бір әулетте авиация саласында 28 адам жұмыс істейтінін мақтанышпен көрсете білді. Әулет анасы Марал Хамзина қазақтан шыққан тұңғыш бортсерік қыз болса, бүгінде немере сүйіп отырған ақ жаулықты әже.
Сарыарқа ауданының намысын қорғаған Ахметов Кендай әулеті өз өнерлерімен алға шықса, Байқоңыр ауданынан қатысқан Ысқақов Дүйсенхан әулеті ағайынның ауызбіршілігі қандай болатынын танытты. Алматы ауданынан бақ сынаған Қуандық Дүкесовтер әулеті үлгілі ананың, үкілі қыздың рөлін айрықша алып шықты. Нұра ауданынан келген Ахметжановтар отбасы да ұлттық құндылықтарды насихаттауға барын салды.
Астана қаласы Ардагерлер кеңесінің төрағасы Сансызбай Есілов мұндай байқау балаларды еңбекқорлыққа, үлкенге құрмет көрсету, кішіге қамқор болу, жалпы адамгершіліктің барлық ережелерін үйренуге, халқымыздың салт-дәстүрін сақтап, оны бағалай білуге тәрбиелейтінін айтты.
Байқау соңында «Ұлағатты ата, саналы ұрпақ», «Асыл әже, ибалы келін», «Үлгілі ана, үкілі ару», «Үлгілі әке, мейірімді ұл» және «Ағайындар – әулет тірегі» номинациялары бойынша жеңімпаздар анықталды.
Қазылар алқасының қорытындысы бойынша Алматы ауданының Дүкесовтер отбасы «Үлгілі ана – үкілі ару» номинациясын, Байқоңыр ауданының Ысқақовтар отбасы «Ағайындар – әулет тірегі» номинациясын, Есіл ауданынан келген Хамзиндер отбасы «Үлгілі әке, мейірімді ұл» номинациясын, Нұра ауданының Ахметжановтар отбасы «Ұлағатты ата, саналы ұрпақ» номинациясын және Сарыарқа ауданының Ахметовтер отбасы «Асыл әже, ибалы келін» номинацияларын өзара бөлісті.
Байқау соңында өнер көрсеткен барлық отбасыларға арнайы сыйлықтар табысталды. Кеш ары қарай «Есіл толқындары» халықтық ардагерлер ансамблі,
№106 мектептің көркем өнерпаздары мен Қазақ Ұлттық Өнер университетінің студенттерінің өнер көрсетуімен жалғасты.
А.БИМЕНДІ
