Семей қаласында орталық алаңда шырша тұрғызуға жәрдемдескен мұғалім Қуат Айтқалиев биіктен құлап, ауыр жарақат алды. Оқу-ағарту министрі Ғани Бейсембаев педагогты жұмысқа тарту туралы ойын айтты.
«Семей қаласында мұғалімдерді жаңажылдық шыршаны безендіруге тарту және әріптесіміздің осы іс барысында жарақат алуы – заң бұзушылықтың айқын көрінісі», – деп жазды ол желідегі парақшасында.
Министр тексерістің әділ жүргізілуін талап етті.
«Бұл оқиғаға байланысты облыс басшылығы әділ әрі жан-жақты тексеру жүргізіп, алдағы уақытта мұндай келеңсіздіктердің қайталануына жол бермеу үшін тиісті шаралар қабылдайды деп үміттенемін», – деді Бейсембаев.
Ғани Бейсембаевтың айтуынша, қазіргі уақытта жарақат алған мұғалімге барлық қажетті медициналық көмек көрсетіліп жатыр.
