Рахмоновтың UFC турниріндегі жекпе-жегін қайдан және қашан көруге болады?
UFC рейтингінде Шавкат үшінші орында тұр, ал оның қарсыласы Иэн жетінші сатыда орналасқан
8 желтоқсан, жексенбіде жеңіліп көрмеген қазақстандық UFC жекпе-жек шебері Шавкат Рахмонов (18-0) әлемнің үздік лигасында кезекті жекпе-жегін өткізеді. Ол ирландиялық Иэн Гэрримен (15-0) күш сынасады.
30 жастағы Шавкат Рахмонов пен 27 жастағы Иэн Гэрридің жекпе-жегі жыл соңындағы UFC-дің нөмірленген соңғы турнирі – UFC 310 аясында өтеді. Бұл оқиға АҚШ-тың Невада штатындағы Лас-Вегаста орналасқан T-Mobile Arena аренасында ұйымдастырылады.
Бұл турнир 14 жекпе-жекті қамтиды, оның бесеуі негізгі кард аясында өтеді. UFC 310 турнирінің алғашқы жекпе-жектері Қазақстан уақытымен 8 желтоқсанда сағат 04:00-де басталады, ал негізгі кард 08:00-де басталады.
Негізгі кардта Рахмонов пен Гэрридің жекпе-жегіне дейін үш кездесу өтеді. Сондықтан Шавкаттың октагонға шығу уақыты шамамен 09:30 деп болжанып отыр.
Айта кетейік, бұл Шавкат Рахмоновтың UFC-дегі алғашқы бес раундқа жоспарланған жекпе-жегі болмақ. Осы күнге дейін қазақстандық спортшы кәсіби мансабында қарсылас болған 18 спортшының барлығын мерзімінен бұрын жеңген.
UFC жартылай орта салмақ дивизионының қазіргі рейтингінде Шавкат үшінші орында тұр, ал оның қарсыласы Иэн жетінші сатыда орналасқан.
