Леңгірде 20 жастағы жігітті өлтіріп, денесін өртеп жіберген оқушы сотталды

/
Леңгірде 20 жастағы жігітті өлтіріп, денесін өртеп жіберген оқушы сотталды
istockphoto

Түркістан облысында 20 жастағы жігітті өлтіріп, мәйітін өртеп жіберген 9-сынып оқушысы сегіз жылға бас бостандығынан айырылды, деп хабарлайды turkystan.kz.

Оқиға Леңгір қаласында қараусыз қалған ғимаратта болған. Ол жерден ер адамның мәйіті табылғаннан кейін, полиция күдікті ретінде жасөспірімді ұстаған, деп хабарлады Жетінші арна.

Тергеу мәліметінше, қыз қылмысты алдын ала жоспарлаған. Оқиғадан бір күн бұрын пышақ сатып алып, кейін 20 жастағы жігітті кездесуге шақырған. Кездесу кезінде жәбірленушінің кеуде тұсына 5-6 рет пышақ сұғып, кейін өртеп жіберген. Сараптамаға сәйкес жәбірленушінің денесінің 30 пайызы өртеніп кеткен.

"Бір күн бұрын сатып алған пышақпен жәбірленушінің кеуде тұсынан бірнеше рет соққы жасап, сол жерде қалдырып кеткен. Жәбірленуші қайтыс болғанына көз жеткеннен кейін дүкеннен сіріңке, жанатын сұйық материалдарды алып, оқиға болған жерге қайтадан барып, жәбірленушінің денесін өртеп жіберген", - дейді Қылмыстық істер жөніндегі ауданаралық сот төрағасы Дәурен Мадалиев.

Сотталушы марқұм 20 жастағы жігіт өзін зорлағысы келгенін айтқан. Алайда бұл уәж сотта дәлелденбеді. Сот жасөспірімді Қылмыстық кодекстің қасақана адам өлтіру бабы бойынша кінәлі деп таныды. Оған сегіз жыл бас бостандығынан айыру жазасы кесілді. Жасөспірім қыз жазасын кәмелетке толмағандарға арналған орташа қауіпсіздік мекемесінде өтейді.

Бөлісу:

Серіктес жаңалықтары