"Халықтың белсенділігі азаматтық қоғамның дамып жатқанының белгісі деп ойлаймын" – бақылаушы

Павлодар облысы, Ақтоғай ауданы №168 учаскенің бақылаушысы Өмірбек Займолда учаскедегі ахуал, дауыс берушілердің белсенділігі және референдумның маңызы туралы ойын айтты. 

АЭС құрылысына қатысты референдум – еліміз үшін маңызды шешімдердің бірі болғандықтан, бақылаушы ретінде өз пікіріммен бөлісуді маңызды деп санаймын. Атом электр станциясы салу мәселесі – Қазақстанның энергетикалық қауіпсіздігі мен болашағы үшін өте өзекті. Қазіргі уақытта елімізде энергияға сұраныс өсіп келеді, және бұл сұранысты қанағаттандыру үшін тұрақты, экологиялық тұрғыдан таза энергия көздеріне көшу қажет. Атом энергиясы парниктік газдардың шығарындыларын азайтып, көмір мен басқа да ластаушы энергия көздеріне тәуелділікті азайтуға мүмкіндік береді. Бұл өз кезегінде климаттың өзгеруіне қарсы күресте үлкен рөл атқаруы мүмкін, – дейді ол.

Бақылаушының сөзінше, ең бастысы – халықтың денсаулығы мен қоршаған ортаны қорғау.

Алайда, АЭС құрылысы тек артықшылықтармен шектелмейді. Оның қауіпті тұстары да бар екенін ұмытпауымыз қажет. Атом энергиясын қолданудағы басты мәселелердің бірі – қауіпсіздік. Әлемде орын алған бірнеше апаттар АЭС-тердің қаншалықты үлкен қауіп төндіретінін көрсетті. Сондықтан, бұл жобаның барлық қауіп-қатерлерін мұқият бағалау өте маңызды. Қазақстан үшін ең бастысы – халықтың денсаулығы мен қоршаған ортаны қорғау.

Сондай-ақ Өмірбек Займолда референдумда дауыс беріп жатқан халықтың белсенділігі азаматтық қоғамның дамып жатқанының белгісі екенін айтады.

Бүгінгі таңда халықтың референдумға белсенді қатысуы еліміздің болашағына деген жауапкершілік пен алаңдаушылықтың айқын көрінісі деп ойлаймын. Референдумға қатысқан азаматтар өз дауыстарын беріп, қоғамның болашағы үшін өз көзқарастарын білдіріп жатыр. Бұл – азаматтық қоғамның дамып, халықтың маңызды шешімдерге тікелей араласуға дайын екенінің белгісі. Әр адамның пікірі ескерілетіні және олардың таңдауы ел болашағын анықтайтыны өте маңызды.