Қазақстандық оқушылар Хьюстоннан жеңіспен оралды
Біздің балалар чемпионат жалғасқан үш күнде көшбасшылар қатарынан көрінді.
Қазақстандық оқушылар Хьюстонда робототехникадан өткен FIRST Championship чемпионатынан жеңіспен оралды.
Аталған чемпионатқа әлемнің 55-тен астам елінен 50 мыңға жуық оқушы қатысты.
Биыл Қазақстан құрамасы сапында FIRST LEGO LEAGUE EXPLORE кіші санатында Астана қаласындағы Quantum STEM School мектебінен IQ Robots командасы, FIRST LEGO LEAGUE CHALLENGE орта санатында Шымкент қаласы Robopark мектебінен Shymside командасы, ал FIRST Tech CHALLENGE жоғары санатында Алматы қаласындағы ФМБ НЗМ-нен Yaku командасы және Алматы қаласындағы РФММ-нен Bolt.M3 командасы бақ сынасты.
Қазақстан құрамасы 6-10 жас аралығындағы бастауыш сынып оқушылары қатысатын IQ Robots командасы үздік таныстырылым және жоба идеясы үшін Best Poster Award номинациясында жеңіске жетті.
Сонымен қатар жоғары сынып оқушыларынан құралған Bolt.M3 командасы Motivate Award беделді жүлдесін қанжығалады. Айта кету керек, бұл марапат өз елінде және одан тыс жерлерде STEM-ді танымал етуге үлес қосқан командаға беріледі.
Сондай-ақ 10-16 жас аралығындағы оқушыларды біріктірген Shymside командасы жаһандық STEM қозғалысының маңызды критерийі саналатын FIRST бағдарламасының командалық рухы мен негізгі құндылықтарын көрсетті. Сонымен қатар іс-шара ұйымдастырушылары Shymside командасын осы маусымға арналған деректі фильмге түсірді.
«Біздің балалар чемпионат жалғасқан үш күнде көшбасшылар қатарынан көрінді. Олардың алаңдағы ойындарын, жеңістері мен жеңілістерін көру, қазылар алқасының мүшелерімен сұхбатын кулуарда күту сәттері өте қызықты болды. Балаларымызда өте мықты роботтар, инженерлік жобалар, айдентика және негізгі құндылықтар бар. Біздің балаларымызды әлемнің түпкір-түпкірінен жиналған 50 000-нан астам оқушы арасында байқамау мүмкін емес. Мәселен, Bolt.M3 командасы иеленген жүлде – ТМД елдерінің арасындағы мұндай алғашқы марапат», – дейді «Дарын» РҒПО директоры Ғаждембек Тұрсынов.
Естеріңізге сала кетейік, Қазақстан құрамасы Оқу-ағарту министрлігінің қолдауымен USTEM Foundation қоғамдық қоры мен «Дарын» РҒПО ұйымдастырған Central Asia FIRST Championship Орталық Азия чемпионатының нәтижесі негізінде жасақталған болатын. Чемпионатта жеңіске жеткен оқушылар әлемдік жоғары оқу орындарындағы стипендиялар мен гранттарға қол жеткізуге мүмкіндік алады.
