Халық жазушысы Қалижан Бекхожиннің жары өмірден өтті
Қаралы хабарды Қазақстан Жазушылар одағы растады.
![Халық жазушысы Қалижан Бекхожиннің жары өмірден өтті](https://turkystan.kz/cache/imagine/1200/uploads/resized-images/2024/05/1715346406.webp)
Қазақстанның Халық жазушысы, ақын Қалижан Бекхожинның жары Заида Бекхожина қайтыс болды, деп хабарлады turkystan.kz сайты massaget.kz-ке сілтеме жасап
Қаралы хабарды Қазақстан Жазушылар одағы растады. Марқұмды ақтық сапарға шығарып алу рәсімі 12 мамыр күні сағат 10.00-де өтеді.
«Қазақстанның Халық жазушысы Қалижан Бекхожиннің жары Заида Бекхожина дүниеден өтті», - деп жазылған хабарламада.
Заида Бекхожина - саналы ғұмырын ұрпақ тәрбиесіне арнаған ұлағатты ұстаз. Ол ұзақ жыл мектепте тарих пәнінен сабақ берген.
Сонымен қатар, Заида Бекхожина - ақын, драматург, аудармашы, Қазақстанның халық жазушысы (1986), мемлекеттік сыйлықтың иегері Қалижан Бекхожиннің жұбайы. Қалижан Бекхожиннің есімі қазақ әдебиеті тарихында алтын әріппен қалған. Жазушыға «Менің замандастарым» атты еңбегі үшін Қазақ КСР-інің Абай атындағы Мемлекеттік сыйлығы берілген. Сондай-ақ, жазушы ұрпақты Отаншылдыққа, ел мен жерді сүюге баулитын «Жусан» поэмасын жазды. Ал ақ адал махабаттың үлгісі ретінде артына «Мариям Жагорқызы» сынды тың туындылар қалдырды.
Қалижан Бекхожин мен Заида Бекхожинаның ұлы Ерлан Бекхожин - танымал журналист, продюсер, медиаменеджер.